Müəllif: Tamara Mustafayeva, Banco.az
“Moody’s” Fransanın kredit reytinqi üzrə dövri qiymətləndirməsini başa çatdırıb.
Banco.az xəbər verir ki, beynəlxalq kredit reytinqi agentliyi “Moody’s” Fransanın kredit reytinqi üzrə dövri qiymətləndirməsini başa çatdırdığını açıqlayıb.
Agentliyin bəyanatında Fransanın “Aa3” səviyyəsində olan kredit reytinqinin zəngin və şaxələndirilmiş iqtisadiyyatı, eləcə də güclü dövlət institutları ilə dəstəkləndiyi bildirilib. Bununla yanaşı, parlamentdə parçalanma, siyasi və sosial qeyri-sabitlik, yüksək və artmaqda davam edən borc yükü, habelə borca xidmət göstəricilərinin zəifləməsi ölkənin kredit qabiliyyəti qarşısında duran əsas çətinliklər kimi göstərilib.
Bəyanatda əvvəlki qiymətləndirmədən bəri iqtisadi artımın yavaşlaması və büdcə kəsirinin artması səbəbindən Fransanın borc yükünün gözləntiləri üstələdiyi qeyd olunub.
Həmçinin bu müddətdə dövlət istiqrazlarının gəlirliliyinin gözləniləndən daha sürətlə artdığı vurğulanıb. Bundan əlavə, büdcə xərclərinin azaldılması istiqamətində səyləri məhdudlaşdıra biləcək genişmiqyaslı sosial etirazların başladığına diqqət çəkilib.
Agentliyin açıqlamasında bildirilib: “Aa3 reytinqi 2027-ci il üçün büdcə kəsirinin azaldılmasını nəzərdə tutan büdcənin qəbul ediləcəyi, maliyyələşdirmə xərclərinin və ictimai gərginliyin isə qarşıdakı bir neçə ay ərzində müəyyən qədər azalacağı fərziyyəsinə əsaslanır”.
Bizi sosial şəbəkələrdən izləyin!!
