Müəllif: Tamara Mustafayeva, Banco.az
Almaniyada biznes perspektivləri gözlənilmədən aşağı düşüb.
Banco.az xəbər verir ki, “Ifo İnstitutu”nun proqnozlar indeksi yanvar ayında dekabrda qeydə alınan 89,7 səviyyəsindən 89,5-ə enib.
“Bloomberg” iqtisadçılarının proqnozu isə 90,3 səviyyəsində idi. Mövcud şərait indeksi isə cüzi artım göstərib.
“Ifo İnstitutu”nun prezidenti Klemens Fust açıqlamasında “Almaniya iqtisadiyyatı yeni ilə zəif impulsla başladı” fikrini səsləndirib. İstehsalçılar arasında biznes mühiti kəskin şəkildə yaxşılaşsa da, xidmət sektorunda pisləşmə müşahidə olunub.
Avropanın ən böyük iqtisadiyyatı üç ildən sonra ilk dəfə 2025-ci ildə artım qeydə alaraq yeni bərpa mərhələsinə qədəm qoyub. Bu bərpanın infrastruktur və müdafiə sahələrinə yönəlmiş dövlət xərcləri ilə dəstəklənməsi gözlənilir. Almaniya kansleri Fridrix Merts ötən il qeydə alınan 0,2 faizlik iqtisadi artımı qənaətbəxş hesab etməmişdi.
Almaniya Mərkəzi Bankı (Bundesbank) iqtisadiyyatın 2026-cı il ərzində bərpa olunacağını proqnozlaşdırır.Beynəlxalq Valyuta Fondu (BVF) isə ötən həftə cari il üçün iqtisadi artım gözləntisini 1,1 faizə yüksəldib.
Bizi sosial şəbəkələrdən izləyin!!
