Müəllif: Tamara Mustafayeva, Banco.az
“Google”un baş direktoru Sundar Piçai qlobal süni intellekt təhsili üçün 120 milyon dollarlıq fond yaradıb.
Banco.az xəbər verir ki, texnologiya nəhəngi “Google”un CEO-su Sundar Piçai indiyə qədərki ən transformativ texnologiya kimi təsvir etdiyi süni intellekt üçün ilkin olaraq 120 milyon dollar dəyərində qlobal süni intellekt təhsili fondu yaradıb.
BMT-nin Gələcək Sammitində çıxış edən Sundar Piçai süni intellekti indiyə qədər yaradılan ən transformativ texnologiya kimi təsvir edib. O, süni intellekt və davamlı inkişaf üçün gördüyü dörd geniş imkanı vurğulayıb.
Onun fikrincə, bunlara insanların öz dillərində məlumat əldə etmələrinə kömək etmək, elmi kəşfləri sürətləndirmək, iqlim fəlakətləri barədə xəbərdarlıq etmək və iqtisadi tərəqqiyə dəstək göstərmək daxildir.
Piçai süni intellektin dərin saxtakarlıqlar kimi risklər də daşıdığını etiraf etsə də, bu texnologiyanın iqlimə təsirindən bəhs etməyib.
O, əlavə edib ki, “Google” 120 milyon dollarlıq “Qlobal AI Fürsət Fondu” yaradır ki, bu fond vasitəsilə yerli qeyri-kommersiya təşkilatları və QHT-lərlə əməkdaşlıq edərək, süni intellektlə bağlı təhsil və təlimləri bütün dünya icmalarında əlçatan edəcək.
Bizi sosial şəbəkələrdən izləyin!!
