Müəllif: Şəbnəm İbrahimxəlilova,Banco.az

“JPMorgan Chase”in CEO-su Ceymi Daymon süni intellektin (AI) bəzi iş yerlərini aradan qaldıracağını, digərlərinin isə xarakterini dəyişəcəyini açıqlayıb.

Dimonun fikrincə, süni intellektdən istifadənin qarşısını almaq mümkün deyil. Şirkətlər rəqabətdə qalmaq üçün texnologiyanı tətbiq etməyə davam edəcək. Bununla yanaşı, prosesin həddindən artıq sürətli getməsi əmək bazarında ciddi problemlər yarada bilər.

Əsas risk işçilərin yeni bacarıqlar qazanmağa və başqa vəzifələrə keçməyə vaxt tapmamasıdır. Dimon avtomatlaşdırma nəticəsində yüksək maaşlı işlərini itirən insanların daha aşağı gəlirli sahələrə keçməsini mümkün ssenarilərdən biri kimi göstərib.

Bu səbəbdən şirkətlərin əməkdaşları yeni işlərə hazırlaması və yenidən təlim proqramlarına investisiya qoyması vacib sayılır. “JPMorgan Chase” də süni intellektin təsir etdiyi bəzi əməkdaşları başqa vəzifələrə yönləndirir.

Bununla belə, Dimon süni intellektin uzunmüddətli perspektivdə müsbət nəticələr verə biləcəyini düşünür. Texnologiyanın məhsuldarlığı artırması insanların gələcəkdə daha az işləməsinə və daha çox asudə vaxta sahib olmasına şərait yarada bilər.

Əsas məsələ süni intellektin inkişafının qarşısını almaq deyil, texnologiyanın dəyişdirdiyi əmək bazarına işçilərin vaxtında uyğunlaşmasını təmin etməkdir.