Müəllif - Eldar Kərimov -Banco.az
Sənayedə ən böyüklərdən biri olan İsveçrənin yenidən sığorta şirkəti "Swiss Re AG" Kaliforniya ştatında yanvar ayında baş vermiş yanğınlarla bağlı sığorta tələblərini 700 milyon dollardan az məbləğdə qiymətləndirib.
Şirkət öz qiymətləndirməsində bu təbii fəlakətdən ümumi sığortalanmış zərərin təxminən 40 milyard dollar təşkil edəcəyini nəzərdə tutur. Müvafiq xərclər birinci rübün nəticələrində əks olunacaq, bu barədə şirkətin mətbuat relizində qeyd edilib.
"Swiss Re"nin maliyyə direktoru Con Deysi CNBC-yə bildirib ki, şirkət Kaliforniyadan çıxmaq niyyətində deyil, lakin "nə baş verdiyini anlamaq və gözlənilən zərərlərin hesablanması modellərinin düzgünlüyünə əmin olmaq" istəyir.
"Biz bu riskləri düzgün hesablaya biləcəyimizə və Kaliforniya ştatında sığorta təklif edən şirkətləri dəstəkləməyə davam edə biləcəyimizə inanırıq," - deyə o qeyd edib. "Sadəcə hesablamaların adekvat olduğundan əmin olmalıyıq."
Bir gün əvvəl Almaniyanın "Muenchener Rueckversicherungs-Gesellschaft AG" (Munich Re) şirkəti Kaliforniya yanğınlarından öz itkilərini 1,2 milyard dollar olaraq qiymətləndirmişdi.
