Müəllif:Mehin Qasımova,Banco.az
Rusiyanın hücumları Ukraynanın ərzaq ixracına zərər vurub.
Banco.az xəbər verir ki, Odessa limanlarına edilən hücumların artması Ukraynanın buğda və qarğıdalı ixracının kəskin şəkildə azalmasına səbəb olub.
Ukrayna Fermerlər Birliyi (UAC) bildirib ki, Rusiyanın bu ay limanlara dron və raket hücumları ölkənin ərzaq ixracına ciddi şəkildə mane olub. Dəmir yolu vasitəsilə daşınmaların yönləndirilməsi səylərinə baxmayaraq, ticarətdə əhəmiyyətli dərəcədə azalma müşahidə olunub.
Ukrayna dünyanın aparıcı buğda və qarğıdalı ixracatçılarından biridir və günəbaxan yağının bir nömrəli ixracatçısıdır. Lakin Odessa bölgəsindəki limanlara demək olar ki, hər gün edilən hücumlar onun ixrac potensialını kəskin şəkildə azaldıb.
UAC-ın məlumatlarına görə, dekabr ayı üçün planlaşdırılan 1 milyon ton buğda ixracından yalnız 375 min tonu reallaşdırılıb. Qarğıdalıda 2 milyon tonluq müqavilədən 1,5 milyon tonu tədarük edilib. Günəbaxan yağında isə 410 min tonluq müqavilədən yalnız 275 min tonu göndərilib. Mütəxəssislər bildirirlər ki, ayın sonuna qədər ümumi ixracın 350 min tonu keçməsi çətin olacaq.
Assosiasiya bildirib ki, üç əsas ixrac limanından ən azı birinin tamamilə bağlandığı, digərlərinin isə yalnız 20 faizlik tutumla işlədiyi bildirilir. Dunay çayı limanlarını birləşdirən logistika xətlərinə dəyən ziyan alternativ marşrutları da məhdudlaşdırır.
Ötən ilin dekabr ayında Ukrayna 800 min ton buğda, 2,6 milyon ton qarğıdalı və 378 min ton günəbaxan yağı ixrac edib. Bu il, 1-22 dekabr tarixləri arasında ümumi taxıl ixracı 1,82 milyon tona düşüb. Keçən il eyni dövrdə bu rəqəm 2,88 milyon ton olub.
