Müəllif: Tamara Mustafayeva, Banco.az
“Microsoft” 2008-ci ildən bəri ən pis rübünə hazırlaşır.
Banco.az xəbər verir ki, süni intellekt infrastrukturuna yönəldilən investisiyaların gəlir artımına nə vaxt təsir göstərəcəyi sualı getdikcə daha tez-tez gündəmə gəlir. Bu fonda “Microsoft” kapital xərclərini ikiqat artırır. Digər tərəfdən, investorlar “Anthropic” və “OpenAI” kimi süni intellekt startaplarının “Microsoft” kimi şirkətlərin məhsullarını əvəz edə biləcək agentlər hazırladığı ilə bağlı narahatlıqlar səbəbindən proqram təminatı şirkətlərinin səhmlərini satırlar.
Səhmləri portfelində saxlayan “Janus Henderson Investors” şirkətinin portfel meneceri Conatan Kofski bildirib: “Microsoft-a ödəniş etmək əvəzinə, daha çox müştərinin birbaşa süni intellekt təchizatçılarına yönələ biləcəyi və bunun da şirkətin əsas fəaliyyət sahəsini poza biləcəyi, ən azı isə qiymət siyasəti və mənfəət marjalarına təzyiq göstərə biləcəyi ilə bağlı narahatlıqlar mövcuddur”.
Şirkətin səhmləri birinci rübdə 24 faiz dəyər itirib və 2008-ci ilin dördüncü rübündə qeydə alınan 27 faizlik azalmadan sonra ən böyük geriləməyə doğru irəliləyir. “Microsoft”un göstəriciləri “Möhtəşəm Yeddilik” adlandırılan texnologiya nəhəngləri arasında ən zəif nəticə kimi qiymətləndirilir. Bu müddət ərzində şirkəti izləyən indeks isə 13 faiz azalıb.
Baş verən satış dalğası nəticəsində səhmlər nisbətən daha ucuz səviyyəyə enib. Hazırda səhmlər qarşıdakı 12 ay üçün 20-dən aşağı qiymət-gəlir nisbəti ilə ticarət olunur ki, bu da 2016-cı ilin iyun ayından bəri ən aşağı göstəricidir. “Microsoft”un qiymət-gəlir nisbəti “S&P 500” indeksindən bir qədər yüksək olsa da, səhmlər son dövrdə 2015-ci ildən bəri ilk dəfə olaraq bu geniş bazar indeksinə nisbətən endirimlə ticarət olunub.
Bizi sosial şəbəkələrdən izləyin!!
