Müəllif: Gülnar Əhmədli, Banco.az
Biznes dünyasında şirkətlərin uzunmüddətli uğuru yalnız məhsul və xidmət keyfiyyəti ilə deyil, həm də marka etibarı ilə ölçülür. Etibar istehlakçıların marka haqqında formalaşdırdığı ümumi təsəvvür və inamı ifadə edir.
Marka imici daha çox vizual üslub və ilk tanışlıqla bağlı olsa da, marka etibarı müştəri məmnuniyyəti, sadiqlik və inam kimi dəyərlərlə formalaşır. Güclü marka etibarı şirkətin bazarda mövqeyini möhkəmləndirir, böhran dövrlərində isə onu risklərə qarşı daha dayanıqlı edir.
Mütəxəssislərin fikrincə, müsbət marka etibarı yaratmaq üçün şirkətlər aşağıdakı prinsiplərə diqqət yetirməlidirlər:
- Müştəri və tərəfdaşların gözləntilərinə uyğun davranmaq,
- Keyfiyyətli məhsul və xidmət təqdim etmək,
- Müştəri yönümlü yanaşmanı gücləndirmək,
- Peşəkarlığı və ixtisası ön plana çıxarmaq,
- Şirkət vizyonunu və dəyərlərini düzgün şəkildə ictimaiyyətə çatdırmaq,
- Sosial məsuliyyət layihələrinə dəstək verərək cəmiyyətə töhfə vermək.
Krizis dövrlərində marka etibarının qorunması isə ayrıca yanaşma tələb edir. Şirkətlər məsuliyyəti üzərinə götürməli, şəffaf və səmimi kommunikasiya aparmalı, eyni zamanda emosional üslubla ictimaiyyətin etimadını bərpa etməlidirlər. Sosial media və digər kommunikasiya kanallarında aktiv olmaq, düzgün mesajlarla brendin imicini yeniləmək də bu mərhələdə mühüm rol oynayır.
Ekspertlərin fikrinə görə, marka etibarı yalnız reklamla deyil, şirkətin mədəniyyəti, idarəetmə üslubu və əməkdaşların davranışı ilə də formalaşır. Güclü reputasiya uzunmüddətli investisiya hesab olunur və şirkətlərin davamlı uğur qazanmasının əsas amillərindən biridir.
Bizi sosial şəbəkələrdən izləyin!!
