Müəllif - Fərid İslamov - Banco.az
Çinli akkumulyator istehsalçısı Contemporary Amperex Technology Co. (CATL), Honq-Konq Fond Birjasında səhmlərin yerləşdirilməsi üçün Çin Qiymətli Kağızlar Tənzimləyicisinin icazəsini alıb.
Şirkətin verdiyi məlumata görə, o, 200 milyon səhmdən çox olmayan bir həcmdə satış həyata keçirməyi planlaşdırır.
Reuters-in mənbələrinə istinadən verdiyi məlumata görə, yerləşdirmənin həcmi 5 milyard dolları keçə bilər. Bu, 2021-ci ildə 6,2 milyard dollar dəyərində səhmlər satan Kuaishou Technology şirkətindən sonra, Honq-Konqda son dörd ildə ən böyük birjaya çıxış olacaq.
CATL, əldə olunan vəsaitin bir hissəsini Macarıstanda 7,3 milyard avro dəyərində olacaq akkumulyator istehsalı zavodunun tikintisinə yönəltməyi planlaşdırır.
Yerləşdirmənin təşkilatçıları olaraq Bank of America, China International Capital Corp., China Securities International, JPMorgan Chase, həmçinin Goldman Sachs, Morgan Stanley və UBS təyin edilib.
CATL-in səhmləri artıq Şençjen birjasında ticarət olunur və son 12 ay ərzində onların qiyməti təxminən 37% artıb.
SNE Research analitik şirkətinin məlumatlarına görə, CATL-in elektromobil akkumulyatorları üzrə dünya bazarındakı payı təxminən 37%-dir.
