Müəllif: Gülnar Əhmədli, Banco.az
2026-cı il avqustun 1-nə olan məlumata görə, dünyada meşə və landşaft yanğınları nəticəsində 112,3 milyon hektar ərazi yanıb. Bu, təxminən Cənubi Afrika Respublikasının ərazisi qədərdir. Məlumatlara planlı, kənd təsərrüfatı məqsədli və nəzarətdən çıxan yanğınlar daxildir.
Banco.az xəbər verir ki, 2026-cı ildə yanmış ərazilərin yarıdan çoxu Afrikanın payına düşür. 61,9 milyon hektarla qitə qlobal yanmış ərazilərin 55,1%-ni təşkil edir.
Ölkələr üzrə ilk 10-luq belədir:
-
Konqo Demokratik Respublikası – 13,6 milyon hektar
-
Avstraliya – 11,8 milyon hektar
-
Anqola – 7,5 milyon hektar
-
Cənubi Sudan – 7,0 milyon hektar
-
Mərkəzi Afrika Respublikası – 6,0 milyon hektar
-
Myanma – 4,3 milyon hektar
-
Hindistan – 4,0 milyon hektar
-
Rusiya – 3,3 milyon hektar
-
Qvineya – 3,3 milyon hektar
-
Zambiya – 3,2 milyon hektar
Afrikada yanğınların böyük hissəsi torpaqların təmizlənməsi, otlaqların idarə edilməsi və əkin sahələrinin hazırlanması məqsədilə qəsdən törədilən mövsümi yanğınlarla bağlıdır. Buna baxmayaraq, miqyas olduqca böyükdür: 2026-cı ildə Afrikada ABŞ-dən təxminən 26 dəfə çox ərazi yanıb.
İspaniyada güclü istilər və quraqlıq səbəbindən avqustun 1-dək təxminən 180 min hektar ərazi yanıb. Ölkədəki böyük yanğınlardan biri Avila tarixində ən böyük yanğın kimi qeydə alınıb.
Kanadada isə 2 milyon hektar, ABŞ-də 2,4 milyon hektar ərazi yanıb. ABŞ-də avqustun əvvəlində 100-dən çox böyük yanğın davam edib.
Afrikadan sonra ən böyük yanmış ərazi Avstraliyada qeydə alınıb – 11,8 milyon hektar. Bu göstərici ölkəni qlobal sıralamada ikinci yerə çıxarıb.
Regionlar üzrə isə yanmış ərazilərin 55,1%-i Afrikanın, 17,6%-i Asiyanın, 10,7%-i Okeaniyanın, 7%-i Cənubi Amerikanın, 6,1%-i Şimali Amerikanın və 3,6%-i Avropanın payına düşür.
Bizi sosial şəbəkələrdən izləyin!!
