Tamara Mustafayeva, Banco.az
Karantin müddətində abunə sayı 16 milyona çatan video striminq platforması Netflix yeni serial və filmlərlə kataloqunu zənginləşdirməyə davam edir. Xatırlayırsınızsa, əvvəlki məqalələrimizdən birində karantin günlərində izləyə biləcəyiniz son illərin ən bəyənilən serial və filmlərini təqdim etmişdik. Əgər həmin siyahıdakıları və daha çoxunu izləyib yeni alternativlər axtarırsınızsa, sizə sevindirici xəbərimiz var. Belə ki, may ayında da bir-birindən maraqlı yeni serial və filmlər kataloqdakı yerini alacaq. Gəlin, siyahı ilə tanış olaq.
Həmçinin oxu: Karantin günlərində Netflixdə izləyə biləcəyiniz ən bəyənilən filmlər
1. Hollywood (2020) – 1 may (Serial)
Ölkə: ABŞ
Janr: Tarixi dram
Prodüser: Ryan Murphy, Ian Brennan
İkinci Dünya Müharibəsindən sonra demək olar ki, heç kəsin həyatı əvvəlki kimi deyildi. Serial müharibədən sonrakı dövrdə Amerikada özlərinə film sektorunda yer tapmağa çalışan bir qrup aktyor və prodüserin hekayəsindən bəhs edir. Hollivud bərabər sistemə sahib deyil, burada irqi və cinsi ayrı-seçkilik hökm sürür.
2. All Day and a Night (2020) – 1 may (Film)
Ölkə: ABŞ
Janr: Dram
Rejissor: Joe Robert Cole
Amerika Birləşmiş Ştatlarında qara dərili insanların məruz qaldığı irqi ayrı-seçkilikdən bəhs edən filmin baş rollarını Jeffrey Wright və Ashton Sanders bölüşürlər. Atası quldur olan, ancaq özü isə əsla ona oxşamaq istəməyən bir gənc ətrafındakı insanlar tərəfindən bu yola çəkilir. Gəncin həbs edilməsi ilə filmin hekayəsi başlayır.
3. The Gentlemen (2020) – 5 may (Film)
Ölkə: Birləşmiş Krallıq, ABŞ
Janr: Aksiyon, Komediya
Rejissor: Guy Ritchie
Matthes McConaughey, Charlie Hunnam, Henry Golding və Colin Farrell kimi məşhur aktyorları birləşdirən film tanınmış rejissor Guy Ritchie imzası daşıyır. Amerika əsilli narkotik satıcısı Mickey Pearson təqaüdə çıxmaq istəyir, ancaq işlər istədiyi kimi cərəyan etmir və hadisələr başlayır.
4. Spider-Man: Homecoming (2017) – 7 may (Film)
Ölkə: ABŞ
Janr: Aksiyon, Fantastika, Macəra
Rejissor: Jon Watts
Digər Marvel filmləri kimi tamaşaçıları ekrana bağlayan bu filmin baş rolunu Tom Holland ifa edir. Peter Parker digər gənclər kimi adi məktəb həyatı yaşayır. Ancaq digər gənclərdən fərqli olaraq eyni zamanda dünyanı təhdid edən Vulture ilə də mübarizə aparır.
5. The Eddy – 8 may (Serial)
Ölkə: ABŞ
Janr: Musiqili dram
Prodüser: Jack Thorne
Serialın hekayəsi müasir Parisin rəngli və mədəni məhəllərində cərəyan edir. Bar sahibini və o barın orkest heyətini şəhərdə bir çox təhlükə gözləyir. Dram janrında olan serialda macəra da əksik olmayacaq.
6. White Lines (2020) – 15 may (Serial)
Ölkə: İspaniya, Birləşmiş Krallıq
Janr: Dram
Prodüser: Álex Pina
Mançesterli bir DJ İbizada itkin düşür. İyirmi ildən sonra cəsədinin tapılması ilə hadisələr cərəyan etməyə başlayır. Qətli araşdırmağa başlayan DJ-in bacısının həyatı sirlərlə dolu bir adaya addım atdığı andan etibarən tamamilə dəyişir.
Həmçinin oxu: Karantin günlərində izləyə biləcəyiniz ən bəyənilən Netflix serialları
Bizi sosial şəbəkələrdən izləyin!!
