Müəllif: Gülnar Əhmədli, Banco.az
Pasportun gücü indeksi ölkə vətəndaşlarının əvvəlcədən viza almadan səyahət edə bildiyi istiqamətlərin sayına əsasən tərtib olunur və qlobal səyahət azadlığının ən nüfuzlu göstəricilərindən biri hesab edilir.
Banco.az Henley Pasport İndeksinə istinadən xəbər verir ki, 2026-cı ildə reytinqə 192 vizasız istiqamətlə Sinqapur başçılıq edir.
Yaponiya, Cənubi Koreya və Birləşmiş Ərəb Əmirlikləri hər biri 188 istiqamətlə ikinci yeri bölüşür. İlk onluqda həmçinin Norveç (186), İsveçrə (185), Aİ ölkələri (184), Böyük Britaniya (184), Malayziya (183), Avstraliya (183), Kanada (183) və Yeni Zelandiya (183) yer alır. Bu nəticələr Asiya və Avropa ölkələrinin qlobal mobillik baxımından üstün mövqeyini qoruduğunu göstərir.
Reytinqin ən diqqətçəkən göstəricilərindən biri Birləşmiş Ərəb Əmirliklərinə məxsusdur. Ölkə son 20 ildə vizasız səyahət edilə bilən istiqamətlərin sayını 153 ölkə artıraraq dünyanın ən güclü pasportlarından birinə sahib olub. Bu yüksəliş fəal diplomatik siyasət və qarşılıqlı viza sazişləri ilə əlaqələndirilir.
Reytinqin son pilləsində isə cəmi 22 vizasız istiqamətlə Əfqanıstan qərarlaşıb. Onu Suriya (25), İraq (28), Pakistan (29) və Yəmən (30) izləyir. Bu ölkələrin zəif göstəriciləri uzunmüddətli münaqişələr, siyasi qeyri-sabitlik və məhdud beynəlxalq əməkdaşlıqla izah olunur.
Bununla yanaşı, viza qaydaları daim dəyişir. Son illərdə Böyük Britaniya və Kanada Çinlə vizasız səyahət razılaşması əldə etsə də, ABŞ vətəndaşları hələ də Çinə giriş üçün viza almaq məcburiyyətində qalan yüksək reytinqli pasport sahibləri arasında yer alır.
Bizi sosial şəbəkələrdən izləyin!!
