Müəllif:Mehin Qasımova,Banco.az
ABŞ-ın Florida ştatında yerləşən "Indian Creek Village" dünyanın ən varlı insanlarının yaşadığı ən təhlükəsiz və qapalı yaşayış məkanlarından biri kimi tanınır.
Banco.az xəbər verir ki, Biscayne körfəzində yerləşən süni ada ictimaiyyət arasında “milyarderlər sığınacağı” adlandırılır.
1939-cu ildə yaradılan "Indian Creek Village" milyonlarla dollarlıq malikanələri və yüksək təhlükəsizlik tədbirləri ilə seçilir. Lakin adada yaşamaq yalnız böyük sərvətə sahib olmağı deyil, həm də olduqca sərt qaydalara əməl etməyi tələb edir.
Qaydaları pozan əmlak sahibləri gündəlik 500 dollara qədər cərimə ilə üzləşə bilərlər.
Tikinti işlərinə də ciddi məhdudiyyətlər tətbiq olunur. Evlərin sahəsi ən azı 464,5 kvadratmetr olmalı, tikilinin müəyyən hissəsi əsas dam örtüyünün altında yerləşməlidir. Hətta həyət və bağların abadlaşdırılması belə qaydalarla tənzimlənir. Məsələn, adada otların hündürlüyünün 15,24 santimetrdən çox olmasına icazə verilmir.
Qaydalar ev heyvanlarına da şamil edilir. Bələdiyyənin xüsusi icazəsi olmadan bir qrupda üçdən çox heyvan saxlamaq qadağandır.
Bundan əlavə, hovuzların, qonaq evlərinin, hasarların və fövqəladə generatorların yerləşdirilməsi ilə bağlı da xüsusi məsafə və tikinti tələbləri mövcuddur.
Beləliklə, dünyanın ən varlı insanlarının məskunlaşdığı bu ada yalnız dəbdəbəli həyat tərzi ilə deyil, sərt qaydaları və yüksək təhlükəsizlik səviyyəsi ilə də diqqət çəkir.
