Müəllif:Mehin Qasımova,Banco.az

Böyük Britaniyada Mançester, Stansted və Şərqi Midlends hava limanlarını idarə edən Manchester Airports Group (MAG) kiberhücuma məruz qalıb.

Banco.az xəbər verir ki, şirkət hücum nəticəsində təxminən 8,7 milyon müştərinin şəxsi məlumatlarına icazəsiz giriş əldə edildiyini açıqlayıb.

Sızdırılan məlumatlar arasında müştərilərin elektron poçt ünvanları, telefon nömrələri, poçt kodları və avtomobillərin qeydiyyat məlumatları yer alır. MAG bildirib ki, məlumatların əhəmiyyətli hissəsi hava limanlarının Wi-Fi xidmətlərindən istifadə zamanı toplanan elektron poçt ünvanlarından ibarətdir. Şirkət bütün məlumatların ələ keçirilmədiyini də vurğulayıb.

MAG-ın məlumatına görə, bank və ödəniş məlumatları hücumdan təsirlənməyib. Kiberhücum hava limanlarının əməliyyat sistemlərinə də təsir göstərməyib və uçuşlar normal rejimdə davam edir. Bununla belə, təhlükəsizlik tədbiri olaraq şirkətin onlayn “Sifarişimi idarə et” xidmətinə giriş müvəqqəti məhdudlaşdırılıb.

Hadisə aşkar edildikdən dərhal sonra təsirlənmiş sistemlərə giriş məhdudlaşdırılıb və kibertəhlükəsizlik üzrə mütəxəssislər araşdırmaya cəlb olunub. Şirkət həmçinin hadisə barədə aidiyyəti qurumlara məlumat verib.

MAG məlumatları sızdırılan müştəriləri mümkün fırıldaqçılıq cəhdlərinə qarşı diqqətli olmağa çağırıb. Müştərilərə hava limanlarının adından göndərilən şübhəli elektron məktubları və SMS-ləri açmamaq, tanımadıqları keçidlərə daxil olmamaq və əlavələri yükləməmək tövsiyə olunub.

Şirkət bildirib ki, müştərilərdən heç vaxt bank hesabı, ödəniş kartı və ya parol məlumatlarını tələb etmir. Mövcud rezervasiyaların qüvvədə qaldığı və müştərilərin avtomobil park xidmətlərinin fəaliyyətində fasilə yaranmadığı da açıqlanıb.

MAG kiberhücumun sərnişinlərin və aviasiya təhlükəsizliyinin riskə atılmasına səbəb olmadığını bildirib və məlumatları sızdırılan müştərilərdən yaranmış narahatlığa görə üzr istəyib.