Müəllif: Tamara Mustafayeva, Banco.az
Almaniyanın sənaye istehsalı proqnozları üstələyib.
Banco.az xəbər verir ki, Almaniyanın Federal Statistika İdarəsinin (Destatis) açıqladığı məlumata görə, may ayında sənaye istehsalı aylıq müqayisədə 0,9 faiz artaraq analitiklərin 0,1 faizlik proqnozunu üstələyib. İllik müqayisədə isə sənaye istehsalı dəyişməyib.
Mövsümi dalğalanmaların təsirini azaltmaq üçün aparılan üç aylıq müqayisə göstərir ki, 2026-cı ilin mart–may dövründə sənaye istehsalı əvvəlki üç ayla müqayisədə 0,1 faiz artıb. İlkin məlumatlara yenidən baxıldıqdan sonra isə aprel ayında sənaye istehsalının aylıq artımı 0,4 faizdən 0,2 faizə endirilib.
May ayında qeydə alınan müsbət nəticədə əsas pay avtomobil sənayesinin olub. Belə ki, bu sektorda istehsal aylıq müqayisədə 3,6 faiz artıb. Tikinti sektorunda isə artım 0,9 faiz təşkil edib.
2026-cı ilin may ayında enerji və tikinti sektoru istisna olmaqla sənaye istehsalı aprellə müqayisədə 0,8 faiz yüksəlib. Bu dövrdə investisiya mallarının istehsalı 1,3 faiz, istehlak mallarının istehsalı isə 1,2 faiz artıb. Əvəzində aralıq məhsulların istehsalı 0,4 faiz azalıb. Sənaye xaricində enerji istehsalı isə 0,8 faiz yüksəlib.
Ötən ilin eyni ayı ilə müqayisədə isə enerji və tikinti sektoru istisna olmaqla sənaye istehsalı 1 faiz azalıb.
Bizi sosial şəbəkələrdən izləyin!!
