Müəllif:Mehin Qasımova, Banco.az
ABC News, Washington Post və Ipsos-un keçirdiyi sorğunun nəticələrinə görə, 100 günlük prezidentlikdən sonra Donald Tramp son 80 ildə Amerika liderləri arasında ən aşağı reytinqə sahibdir.
Banco.az xəbər verir ki, araşdırmaya görə, respondentlərin yalnız 39%-i Trampın ölkəni idarə etmə tərzini bəyənir, 55%-i isə prezidentin fəaliyyətindən narazı olduğunu bildirib. Xüsusilə, bir çox respondent iqtisadiyyatın vəziyyətindən narahatdır: 73% onun pis vəziyyətdə olduğuna inanır.
Belə ki, respondentlərin 71%-i qiymət artımına səbəb kimi Trampın tətbiq etdiyi idxal rüsumlarını göstərir. Respondentlərin yalnız 31%-i ABŞ prezidentinin iqtisadiyyatın uzunmüddətli perspektivdə daha möhkəm təmələ malik olacağına dair arqumenti ilə razıdır.
Sorğu iştirakçılarının əksəriyyəti – 58%-i hesab edir ki, dövlət başçısının hökumətin ölçüsünü və rolunu azaltmaq cəhdləri həddindən artıqdır, 56%-i onun səlahiyyətlərini əsassız olaraq aşdığını iddia edir, 55%-i Tramp administrasiyasının vətəndaşların hüquq və azadlıqlarının müdafiəsi ilə bağlı öhdəliklərinə şübhə ilə yanaşır.
Eyni zamanda respondentlərin 67%-i vətəndaşlığın doğum hüququ ilə ləğvinin, 66%-i Təhsil Nazirliyinin bağlanmasının əleyhinə olub.
Beynəlxalq münasibətlərə gəlincə, respondentlərin 49%-i hesab edir ki, Tramp dünyada ABŞ liderliyini gücləndirməkdənsə, zəiflədib. Eyni zamanda respondentlərin 34%-i onun siyasətini dəstəkləyir.
Rusiya ilə bağlı respondentlərin 46%-i Trampın çox mehriban davrandığını, 11%-i onun yanaşmasını həddən artıq qarşıdurma adlandırdığını, 40%-i isə prezidentin taktikasını bəyəndiyini bildirib.
Sorğu 2025-ci il aprelin 18-22-də ingilis və ispan dillərində 2,464 böyüklərdən ibarət təsadüfi milli seçmə arasında keçirilib. Nəticələrin səhv marjası müsbət və ya mənfi 2 faiz bəndi ola bilər.
