Müəllif:Mehin Qasımova,Banco.az
Qara dənizdə taxıl infrastrukturuna edilən hücumlar qlobal buğda bazarında təchizat narahatlığını gücləndirib.
Banco.az xəbər verir ki, Reuters-in məlumatına görə, liman və gəmilərə zərbələr daşınmaları ləngidib, bəzi taxıl terminallarının fəaliyyətini dayandırıb və əsas idxalçı ölkələrdə ərzaq təhlükəsizliyi ilə bağlı riskləri artırıb.
Çikaqo buğdasının etalon fyuçersləri iyulun əvvəlindən bəri 17%-dən çox bahalaşıb. Qiymət artımı əsasən Qara dəniz regionundan tədarükün azalacağı ilə bağlı gözləntilərlə əlaqələndirilir. Argentina, Avstraliya və ABŞ kimi alternativ ixracatçı ölkələrdə də fiziki buğdanın qiymətləri yüksəlib.
Son həftələrdə Rusiya və Ukraynanın limanlara və gəmilərə hücumları nəticəsində bəzi taxıl terminalları bağlanıb. Yükgöndərənlər pik ixrac mövsümündə onlarla yükün yüklənməsini təxirə salmalı və ya sifarişləri ləğv etməli olublar.
Təchizatın başqa ölkələrə yönəldilməsi isə idxalçılar üçün əlavə xərc yaradacaq.
Hazırda Avstraliya Premium White buğdasının Asiyaya çatdırılma xərcləri də daxil olmaqla qiyməti təxminən 315-320 dollar/ton təşkil edir. ABŞ buğdasının ən ucuz variantları isə təxminən 305 dollar/ton səviyyəsindədir.
Müqayisə üçün, Qara dəniz regionundan ixrac olunan buğdanın böyük hissəsi təxminən 260-280 dollar/ton qiymətinə təklif olunur.
