Müəllif:Ayşən İmanova/Banco.az
2023-cü ildə dünyadakı inkişaf bankları iqlim dəyişikliyi ilə mübarizəyə 125 milyard ABŞ dolları vəsait ayırıb ki, bu da rekord məbləğdir.
Banco.az xəbər verir ki, bu barədə Avropa Yenidənqurma və İnkişaf Bankının (AYİB) hesabatında deyilir.
Bildirilir ki, bu məbləğin 74,7 milyard dolları aşağı və orta gəlirli ölkələrə yönəldilib, 46,9 milyard dolları isə investisiya məqsədləri üçün kredit şəklində ayrılıb.
2022-ci ildə qlobal iqlim maliyyəsi 111,2 milyard dollar təşkil edib ki, bunun da 60,9 milyard dolları aşağı və orta gəlirli ölkələrin payına düşüb.
“Biz çoxtərəfli inkişaf bankları üçün bir qrup olaraq, eləcə də EBRD üçün rekord səviyyəli iqlim maliyyələşdirməsini yenidən elan etməkdən çox məmnunuq”, - Bankın iqlim strategiyası və reallaşdırma üzrə idarəedici direktoru Harri Boyd-Karpenter deyib.
"Biz 2023-cü ilin həm temperatur, həm də bərpa olunan enerji qurğularının həcmi üzrə görünməmiş bir il olduğunu dərindən dərk edirik. Bu, həm fövqəladə iqlim vəziyyətinin həllinin vacibliyini, həm də iqtisadi imkanların miqyasını vurğulayır", - o vurğulayıb.
Hesabata Afrika İnkişaf Bankı, Asiya İnkişaf Bankı (ADB), Asiya İnfrastruktur İnvestisiya Bankı (AIIB), Avropa Şurasının İnkişaf Bankı, EBRD, Avropa İnvestisiya Bankı (AIB), İslam İnkişaf Bankı (IIB), Yeni İnkişaf Bankı və Dünya Bankı Qrupunun (DB) məlumatları daxil edilib.
Bizi sosial şəbəkələrdən izləyin!!
