Müəllif: Tamara Mustafayeva, Banco.az
Tramp ABŞ-da dərman qiymətlərini aşağı salacaq “tarixi” fərmanı imzalayıb.
Banco.az xəbər verir ki, ABŞ prezidenti Donald Tramp Oval Ofisdə keçirdiyi mətbuat konfransında dərman qiymətlərini azaltmaq üçün “tarixi” bir addım atdıqlarını bildirib. Tramp ölkə tarixində səhiyyə sahəsində bu qədər əhəmiyyətli bir prezident fərmanının daha əvvəl imzalanmadığını vurğulayıb.
Dərman qiymətləri 5-10 dəfə baha
Tramp qeyd edib ki, ABŞ-da dərman qiymətləri digər ölkələrlə müqayisədə 5-10 dəfə daha yüksəkdir və bu vəziyyət milyonlarla amerikalının həyatına mənfi təsir göstərir. Yeni fərmanla bu vəziyyətə son qoyulacağını bildirib.
Qiymətlər 30-80% ucuzlaşa bilər
Trampın sözlərinə görə, planlaşdırılan yeni tədbirlər nəticəsində dərman qiymətlərində 30%-dən 80%-ə qədər azalma ola bilər və dərman şirkətləri bu dəyişikliklərə uyğunlaşmağa məcbur olacaqlar. O, həmçinin vasitəçi qurumların və dərman şirkətlərinin yüksək qazanc əldə etdiyini, bu əlavə xərclərin artıq aradan qaldırılacağını deyib.
Səhiyyə naziri: Tramp oliqarxlara qarşı durur
Səhiyyə naziri Robert F. Kennedi isə çıxışında Trampın dərman şirkətlərinə qarşı güclü mövqe nümayiş etdirdiyini qeyd edərək, “Bəziləri Trampın oliqarxların tərəfində olduğunu deyir, əslində isə onlara qarşı bu qədər sərt mövqe tutan bir prezident olmamışdır,” — deyə bildirib.
Bizi sosial şəbəkələrdən izləyin!!
