Müəllif: Tamara Mustafayeva, Banco.az
İş dünyasında yeni dövr: dərəcəyə deyil, bacarıqlara əsaslanan işə qəbul.
Banco.az xəbər verir ki, süni intellekt bir çox sahədə insanları təhdid edir, işəgötürənlər diploma dair tələbləri bir-bir aradan qaldırır və yeni məzunlar əllərindəki o kağız parçasının – diplomlarının – sərf etdikləri vaxta və pula dəyib-dəymədiyini sorğulayırlar. Karyera üçün əsas açar artıq universitet qapısında deyil. Bəs bu dönüş nöqtəsi əslində nə deməkdir?
"Great Place to Work" şirkətinin CEO-su Maykl Buşun fikrincə, cavab çox aydındır: Diplomlar artıq işəgötürənlərin prioritet siyahısında üst sıralarda yer almır. Buşun illərdir Fortune ilə birgə apardığı qlobal işəgötürən təhlilləri şirkət mədəniyyətlərini, işə qəbul tendensiyalarını və əməkdaş təcrübələrini araşdırır. Və son hesabatlara görə işə qəbul sahəsində inqilabi bir dəyişiklik baş verir: Diplom deyil, bacarıq tələb olunur.
Son beş ildə, xüsusilə “İşləməli ən yaxşı şirkətlər” siyahısında yer alan firmaların işə qəbul yanaşması tək bir nöqtədə birləşir: Bacarıqlar və inkişaf potensialı. Artıq müsahibələrdə namizədin diplomu yox, problemləri necə həll etməsi, öyrənməyə nə qədər açıq olması və gələcəyin tələblərinə uyğunlaşa bilmə qabiliyyəti dəyərləndirilir.
Buşa görə bu dəyişikliyin qlobal miqyasda qəbul görməsinin səbəbi sadədir: Diplomlar sadəcə bilik səviyyəsini göstərir, lakin bir işi bacarmaq qabiliyyətini təmin etmir.
Bəs bu dəyişiklik yalnız işəgötürənlərin baxış bucağınımı dəyişir? Indeed platformasının yeni sorğusuna görə, Z nəsli məzunlarının 51 faizi universitet diplomunu “pul israfı” hesab edir. Təhsil xərcləri artdıqca, məşğulluq zəmanəti də zəifləyir.
Amma bu vəziyyət hər sahəyə şamil deyil. Nyu-York Federal Ehtiyat Bankının məlumatlarına görə, kosmik mühəndislik kimi bəzi STEM sahələrinin məzunları karyeralarının ortasında ildə orta hesabla 125.000 dollar qazanırlar. Digər tərəfdən, tibb kimi sahələrdə magistr dərəcəsi hələ də 200.000 dollardan yüksək maaşlı vəzifələrə yol açır.
İş dünyasında bərabər imkanlar yaratmaq yalnız məzunları deyil, ömür boyu öyrənənləri, təcrübə ilə inkişaf edənləri və fərqli yollarla mütəxəssis olanları da əhatə etməklə mümkündür. Yeni dövrdə diplom sahibi olmaq bir seçim ola bilər, lakin bir məcburiyyət deyil.
Bizi sosial şəbəkələrdən izləyin!!
