Müəllif: Tamara Mustafayeva, Banco.az
“Apple” yapon dizayn evi Issey Miyake ilə əməkdaşlıq edərək ağıllı telefonu zərifliyin bir hissəsinə çevirən yeni aksesuarını — iPhone Pocket modelini təqdim edib.
Banco.az xəbər verir ki, “Apple” texnologiyanı yenidən moda ilə bir araya gətirir. Şirkətin Issey Miyake ilə yeni əməkdaşlığı nəticəsində smartfon artıq yalnız bir cihaz deyil, eyni zamanda zərifliyin və dizayn estetikasının bir parçasına çevrilir. Nəticədə ortaya çıxan məhsul isə iPhone Pocket adlanır.
14 noyabrda qlobal satışa çıxarılan iPhone Pocket Apple Design Studio və Miyake Design Studio-nun birgə işi kimi hazırlanıb. Məhsul bir moda aksesuarı kimi görünməsinə baxmayaraq, funksionallığını da qoruyur. Üçölçülü toxuma texnikası ilə tək, fasiləsiz sapdan hazırlanmış bu kisə formalı aksesuar Miyake-nin “Bir Parça Parça” (A Piece of Cloth) fəlsəfəsinə bir hörmət ifadə edir.
Qısa saplı versiyası 149,95 dollar, çiyindən asılan versiyası isə 229,95 dollar qiymətinə satışa çıxarılıb. Limon, mandarin, bənövşəyi, safir, darçın və qara kimi rəng variantları ilə təqdim olunan model həm gündəlik istifadə, həm də şəhər üslubunu tamamlayan cəlbedici bir aksessuar kimi fərqlənir.
Yarı şəffaf, qabırğalı teksturası iPhone-un ekranını zərif şəkildə görünən edir və əlavə olaraq AirPods və ya kiçik aksesuarlar üçün də yer təmin edir. Yaponiyada istehsal olunan iPhone Pocket “Apple”ın klassik silikon və dəri örtük seriyasını estetik baxımdan yeni bir səviyyəyə qaldıraraq brendin dizayn irsinə yeni bir halqa əlavə edir.
Bizi sosial şəbəkələrdən izləyin!!
