Müəllif:Mehin Qasımova,Banco.az

Rusiyanın Çinə enerji tədarükü 2026-cı ilin ilk rübündə fərqli istiqamətlər üzrə dəyişkən dinamika nümayiş etdirib.

Banco.az xəbər verir ki, Çinin Baş Gömrük İdarəsinin məlumatlarına əsasən, Rusiyanın Çinə xam neft tədarükü illik müqayisədə 31% artaraq 31,86 milyon tona çatıb. Dəyər baxımından isə bu idxal 8,8% artımla 14,37 milyard dollar təşkil edib.

Mayeləşdirilmiş təbii qaz (LNG) idxalında da fiziki artım müşahidə olunub. Belə ki, Rusiyadan LNG tədarükü 6,7% artaraq 1,38 milyon tona yüksəlib. Lakin qlobal enerji bazarlarında qiymət təzyiqləri səbəbindən bu tədarükün dəyəri 17,3% azalaraq 651,6 milyon dollara enib.

Bununla yanaşı, boru kəmərləri vasitəsilə qaz ixracında azalma qeydə alınıb. 2026-cı ilin yanvar-mart aylarında Rusiyanın Çinə boru kəməri ilə qaz tədarükü dəyər ifadəsində 8,9% azalaraq 2,3 milyard dollar olub. Qeyd edək ki, Çin tərəfi ənənəvi olaraq bu istiqamətdə fiziki həcmləri açıqlamır.

Eyni zamanda, Rusiya neft məhsullarının Çinə ixracı da azalma tendensiyası göstərib. Bu kateqoriya üzrə ixracın dəyəri illik müqayisədə 3,7% azalaraq 1,53 milyard dollar təşkil edib.