Üç min ildən çoxdur ki, bəzi insanlar hakimiyyətə gəlir, digərləri isə onu izləyir. Bəs bunun səbəbi nədir? Necə olur ki, bəzi insanlar hakimiyyət oyununda “anadangəlmə professional” olur, digərləri isə yox? Hakimiyyəti əldə etməyin hansı qanunları var?
Bu kimi suallara strategiya və hakimiyyət mövzularında kitabların müəllifi Robert Qrin “Hakimiyyətin 48 Qanunu” adlı məhşur kitabında cavab verir. Biz də www.readit.az komandası olaraq, həmin kitabın qısa məzmununu sizə təqdim edirik. Qeyd olunmalıdır ki, orijinalda 452 səhifə olmasına baxmayaraq qısa məzmunu 18 səhifədən ibarətdir.
Qısa məzmuna keçid => “Hakimiyyətin 48 Qanunu”.
Müəllif bu kitabı uzun müddətli tədqiqat və müşahidələrdən sonra yazıb. İlk nəzərdə, hakimiyyətdən çox pisliyin qanunlarından bəhs edirmiş kimi görünsə də, əslində onların heç biri qeyri-qanuni deyil.
Müəllif kitabda tarixdəki ən məhşur strateqlərin, dövlət xadimlərinin, saray əhlinin və fırıldaqçıların taktikalarını birləşdirir. Yuxarıda da qeyd etdiyimiz kimi, bu taktikalar əksər hallarda yaxşılığı deyil, pisliyi əhatə edir.
Robert Qrinin müəyyənləşdirdiyi bu qanunlar hakimiyyət və güc sahəsində peşəkarlaşan mütəxəsislərin yazılarına əsaslanır. Həmin qanunlardan bəzilərinin 3 min ildən çox tarixi var. Qədim Çin və İntibah İtaliyası kimi bir-birindən qəti şəkildə fərqlənən sivilizasiyalarda tətbiq olmasına baxmayaraq, müəyyən ümumi fikirləri ifadə edirlər.
Bəzi tənqidçilər tərəfindən “pisliyin kitabı” kimi adlandırılan bu kitabda “düşmənlərinizi tamamilə darmadağın edin”, “insanların zəif tərəflərini tapın”, “dost kimi görünün, casus kimi işləyin” və s. kimi tövsiyələrə yer verilib. Bir çoxumuzun vaxtaşırı şüurlu və şüursuz şəkildə tətbiq etdiyimiz bu metodlar xüsusilə biznes həyatında “hakimiyyəti” ələ keçirmək istəyən insanlar üçün faydalı olur. Kitabı eyni kateqoriyadan olan kitablardan fərqləndirən digər bir cəhət isə burada, “komanda işi”, “pozitiv düşüncə” kimi üsullardan söhbət açılmır.
Məqaləmizdə sizə bir çoxları tərəfindən xüsusilə yüksək qiymətləndirilən bir neçə qanun haqqında qısa məlumat verəcəyik. Bütün qanunlar haqqında isə saytımızdakı qısa məzmundan oxuya bilərsiniz.
4-cü Qanun: Həmişə lazım olduğundan daha az danışın.
İnsanlara sözlərlə təsir etməyə çalışırsınızsa, nə qədər çox danışsanız, o qədər az nəzarət sahibi olarsınız. Qeyri-adi bir şey haqqında danışmasanız belə qeyri-müəyyən, açıq və sirli bir şəkildə danışdıqda söhbətiniz orijinal görünəcək. Güclü insanlar daha az danışaraq ətrafındakılara təsir edir və yaxud onları qorxudur. Çünki nə qədər çox danışsanız, mənasız bir fikir söyləmə ehtimalınız da o qədər artar.
Həmçinin, rəhbərinizdən əvvəl dodaqlarınızı belə tərpətməyin. Unutmayın, sonuncu danışan qazanır.
Güc bir çox cəhətdən zahiri görünüşlə əlaqələndirildiyi üçün az danışdıqda fəaliyyətinizdən asılı olmayaraq olduğunuzdan daha güclü görünürsünüz. Səssizliyiniz insanları narahat edir, çünki onlar şərh və izahat gözləyirlər; nə düşündüyünüzü bilmək istəyirlər. Əgər danışdıqlarınıza diqqət etsəniz, niyyətlərinizi və fikirlərinizi öyrənə bilməyəcəklər. Sizin qısa cavablarınız və susqunluğunuz onların səhvlər etməsinə və öz zəifliklərini göstərməsinə səbəb olacaq.
Bütün bunlarla yanaşı, sakit qalmağın əleyhinizə olduğu vaxtlar da mövcuddur. Bu hal rəhbərlərinizi şübhələndirə və sizə olan inamlarını azalda bilər.
Siz həmçinin, strategiya və liderlik mövzusunda olan digər maraqlı kitabların qısa məzmunlarını oxumaq üçün də saytımıza keçid edə bilərsiniz.
