Müəllif:Mehin Qasımova,Banco.az

Dünyada pasport daşımadan beynəlxalq sərhədləri keçə bilən yalnız üç nəfər var.

Banco.az xəbər verir ki, bu imtiyaz İngiltərə kralı III Çarlz , Yaponiya imperatoru Naruhito və onun həyat yoldaşı imperatriça Masakoya aiddir .

Məlumata görə, Britaniya monarxının xarici səyahətlər üçün standart pasportdan istifadə etməsi tələb olunmur. Kraliça II Yelizavetanın ölümündən sonra bu xüsusi status onun oğlu Kral III Çarlza keçib.

Britaniya Kral Ailəsinin rəsmi saytında yer alan məlumata görə, monarxın adına hazırlanmış xüsusi sənəddə xarici hakimiyyət orqanlarından sənəd sahibinə pulsuz keçid, qorunma və lazımi yardım göstərilməsi tələb olunur. Bu istisna Kral Ailəsinin digər üzvlərinə şamil edilmir; onlar adi pasportlarla səyahət edirlər.

Yaponiyada pasportsuz səyahət etmək praktikası yalnız İmperator Naruhito və İmperatriça Masako ilə məhdudlaşır. Yaponiya Xarici İşlər Nazirliyinin 1971-ci il tarixli sənədinə əsasən, təcrübədə İmperator və ya İmperatriça adına pasportların verilməsi və digər ölkələrdə standart giriş prosedurlarından keçməsinin uyğunsuz hesab edildiyi göstərilir.

İmperator cütlüyü səyahətləri zamanı pasportlar əvəzinə Yaponiya Xarici İşlər Nazirliyi tərəfindən verilən xüsusi sənəddən istifadə edirlər. Səfərdən əvvəl Yaponiya hakimiyyəti cütlüyün gəlişi barədə təyinat ölkəsinə məlumat verir. İmperator ailəsinin digər üzvləri diplomatik pasportlar daşıyırlar.