Müəllif:Mehin Qasımova,Banco.az

Bitkoin çərşənbə axşamı yüksəlişini davam etdirərək 80 min dollar səviyyəsinə yaxınlaşıb.

Banco.az xəbər verir ki, kriptovalyutanın qiyməti 3,1 faiz artaraq 79 739 dollara çatıb. Bitkoin ötən həftə üç gün ərzində 20 faizdən çox bahalaşaraq 2023-cü ildən bəri ən güclü üç günlük artımını nümayiş etdirib. Bu müddətdə 4 milyard dollardan çox qısa mövqe likvidasiya olunub.

Bahalaşmanın əsas səbəblərindən biri spot Bitkoin ETF-lərinə vəsait axınının yenidən güclənməsi və investorların risk iştahının bərpa olunmasıdır.

ABŞ Maliyyə Nazirliyinin uzunmüddətli dövlət istiqrazlarının alışını ikiqat artıracağını açıqlaması da kriptovalyuta bazarına müsbət təsir göstərib. Qərardan sonra istiqraz gəlirlərinin müvəqqəti azalması riskli aktivlərə tələbi artırıb.

İnstitusional investorların Bitkoinə marağı da yenidən güclənib. Ötən həftə ABŞ-da spot Bitkoin ETF-lərinə 1,92 milyard dollar xalis vəsait daxil olub. Bu, Bitkoinin əvvəlki dövr üzrə pik həddə çatdığı oktyabr ayından bəri ən yüksək həftəlik göstəricidir.

Bununla belə, analitiklər yüksəlişin davamlılığı ilə bağlı ehtiyatlı mövqedə qalırlar. Bitkoin oktyabr ayından etibarən uzunmüddətli eniş trendində olub. Bəzi ekspertlər hazırkı yüksəlişin 2023-cü ilin əvvəlində müşahidə olunan ralliyə bənzər qısamüddətli hərəkət ola biləcəyini bildirirlər.