Müəllif:Mehin Qasımova,Banco.az

Britaniyanın lüks avtomobil istehsalçısı "Bentley" elektrikli nəqliyyat vasitələrinə tələbatın gözləniləndən zəif olması fonunda işçi sayını azaltmağa qərar verib.

Banco.az xəbər verir ki, şirkət işçi qüvvəsinin təxminən 6 faizini, yəni 275 nəfəri ixtisar etməyi planlaşdırır.

Baş icraçı direktoru bildirib ki, şirkət ilk tam elektrikli avtomobilini 2027-ci ildə bazara çıxarmağı hədəfləyir.

“Avtomobil sənayesi bütün sahələrdə təzyiq altındadır. Xərclərin azaldılması əsas prioritetdir”, – deyə o vurğulayıb.

Məlumata görə, Bentley-nin 2025-ci il üzrə əməliyyat mənfəəti 42 faiz azalaraq 26 milyon avroya düşüb. Bu azalma qismən "Volkswagen" konserninin yeni elektrik platforması layihəsini dayandırması ilə bağlı olub.

Son illərdə şirkət elektrik avtomobillərinə keçid planlarını mərhələli şəkildə yenidən nəzərdən keçirib. 2024-cü ildə tam elektrikli modellərə keçid üçün müəyyən edilən 2030-cu il hədəfi 2035-ci ilə qədər uzadılıb. Eyni zamanda, şirkət 2035-ci ildən sonra da hibrid modellərin satışını davam etdirə biləcəyini açıqlayıb.

Rəhbərlik bildirir ki, gələcəkdə elektrikli avtomobillər, hibridlər və məhdud sayda benzin mühərrikli modellərdən ibarət balanslaşdırılmış məhsul portfeli formalaşdırılacaq.