Müəllif: Tamara Mustafayeva, Banco.az
Yaponiyada inflyasiya 16 ayın ən yüksək səviyyəsinə çatıb.
Banco.az xəbər verir ki, Yaponiyanın əsas inflyasiya göstəricisi Mərkəzi Bankın (BOJ) sədri Kazuo Ueda rəhbərliyi altında bankın üçüncü dəfə faiz dərəcələrini artırmasının gözlənildiyi saatlardan əvvəl yayımlanan açıqlamaya əsasən, son 16 ayda ilk dəfə 3 faizə çatıb.
Daxili İşlər Nazirliyi cümə günü bildirib ki, təzə qida məhsulları istisna olmaqla istehlakçı qiymətləri dekabr ayında ötən ilin eyni dövrü ilə müqayisədə 3 faiz artıb. Bu artım əvvəlki ayda 2,7 faiz səviyyəsində idi. Proqnozlara uyğun olan bu artım avqust 2023-dən bəri ilk dəfə 3 faizə çatıb.
İnflyasiyadakı artımın əsas səbəbi qaz və elektrik subsidiyalarının tədricən ləğv edilməsindən sonra enerji qiymətlərinin bahalaşması olub. Ümumilikdə, enerji qiymətləri dekabr ayında 10,1 faiz artıb.
Xidmət inflyasiyası 1,6 faizə doğru cüzi sürətlənsə də, enerji xərcləri və təzə qida məhsulları istisna olmaqla indeks noyabr ayındakı artımla müqayisədə dəyişmədən 2,4 faiz hesablanıb.
Sabit inflyasiya göstəriciləri Yaponiya Mərkəzi Bankının cümə günü faiz dərəcələrini artırması üçün səbəbləri dəstəkləyir. Bu addım bazarlar və iqtisadçılar tərəfindən geniş şəkildə gözlənilir. Yanvar ayında faiz artımı ilə bağlı spekulyasiyalar xüsusilə BOJ-un yüksək səviyyəli rəhbərlərinin maaş artımları ilə bağlı müsbət irəliləyişlərə işarə etməsi və ABŞ Prezidenti Donald Trampın ikinci prezidentlik müddətinin ilk günlərində bazarların nisbətən sakit qalması ilə intensivləşib.
Bizi sosial şəbəkələrdən izləyin!!
