Müəllif: Tamara Mustafayeva, Banco.az
Çinli çip istehsalçısı “CXMT” səs-küylü ilkin kütləvi səhm təklifindən (IPO) sonra ilk ticarət günündə səhmlərinin dəyərinin 535 faiz artması ilə diqqət çəkib.
İnvestorların süni intellekt sahəsinin aparıcı şirkətlərindən biri hesab olunan “CXMT”yə güclü maraq göstərməsi nəticəsində şirkətin səhmləri Şanxay birjasında 535 faiz bahalaşıb. Bununla da yaddaş çipləri istehsalçısı Çin birjalarında listinqdə olan ən dəyərli şirkətə çevrilib.
Şirkətin səhmləri ticarət zamanı 55,03 yuanadək yüksələrək bazar dəyərini təxminən 3,7 trilyon yuana (547 milyard dollar) çatdırıb. Bu artım Çin tarixində ikinci ən böyük IPO çərçivəsində 66,6 milyard yuan həcmində vəsait cəlb edilməsindən sonra qeydə alınıb.
“CXMT” Çinin aparıcı yaddaş çipi istehsalçısıdır və smartfonlardan tutmuş süni intellekt serverlərinədək geniş istifadə olunan dinamik təsadüfi giriş yaddaşı (DRAM) bazarında xarici təchizatçılarla rəqabətdə ölkənin ən böyük ümidlərindən biri hesab olunur. Dünyanın dördüncü ən böyük DRAM istehsalçısı olan şirkət, investorlar üçün Çinin qlobal süni intellekt infrastrukturunun formalaşmasındakı roluna sərmayə qoymağa imkan verən nadir ixtisaslaşmış şirkətlərdən biridir.
“Beijing Xinhan Capital”ın baş direktoru Ao Fey bildirib: “Səhmlərin açılış qiyməti əsasən gözləntilərimə uyğun idi. Lakin açılışdan sonra müşahidə olunan kəskin yüksəliş diqqətçəkici oldu”.
Ao Fey əlavə edib ki, “Çinin A kateqoriyalı səhm bazarında yalnız yaddaş texnologiyalarına yönəlmiş şirkətlərin az olduğunu nəzərə alsaq, ilk bir neçə ticarət günündə spekulyativ alqı-satqının kəskin artacağını istisna etmirəm”.
Bizi sosial şəbəkələrdən izləyin!!
