Müəllif:Mehin Qasımova,Banco.az

Avropada birbaşa xarici investisiyalar (XBİ) 2025-ci ildə 7% azalıb.

Banco.az xəbər verir ki, bu barədə Ernst & Young (EY) konsaltinq şirkətinin hesabatında qeyd edilib.

Lakin, qeyri-müəyyən qlobal mühitə baxmayaraq, Avropa xarici investisiyalar üçün davamlı və cəlbedici bir məkan olaraq qalır. 2025-ci ildə region 5000-dən çox yeni layihə cəlb edib.

Fransada birbaşa xarici investisiyalar 2025-ci ildə 17%, Böyük Britaniyada isə 14% azalıb.

Almaniyaya investisiya 10% azalaraq 17 illik minimuma çatıb və azalma ardıcıl səkkizinci ildir ki, qeydə alınıb. Bunun səbəbləri yüksək vergilər, əhəmiyyətli əmək və enerji xərcləri və sərt bürokratik prosedurlar sahəsində islahatların olmamasıdır. 

2025-ci ildə Polşaya birbaşa xarici investisiyalar 10%, İspaniyaya 7%, Türkiyəyə isə 20% artıb.

Avropa müdafiə layihələrinə investisiya 2025-ci ildə 84% artıb. Süni intellekt sahəsindəki birbaşa xarici investisiyalar təxminən iki dəfə (96%), aşağı karbonlu enerji sektorunda isə 25% artıb.

Tibbi avadanlıq sənayesində BXİ 28%, kimya sənayesində 19%, avtomobil sənayesində isə 11% azalıb.