Bu gün, 14 noyabr 2024-cü il tarixində Azərbaycan Respublikasının Mərkəzi Bankı (AMB) Bakıda Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP29) Maliyyə, İnvestisiya və Ticarət Günü çərçivəsində qlobal liderləri “Qlobal maliyyə sistemi: iqlim fəaliyyəti üçün maliyyələşmənin genişləndirilməsi” mövzusu ətrafında toplayıb.
Tədbir AMB-nin sədri Taleh Kazımovun açılış nitqi ilə başlayıb və Azərbaycan Banklar Assosiasiyasının (ABA) prezidenti Zakir Nuriyev tədbirin II panelində çıxış edib və bank sektoru adından Azərbaycan bank sektorunun dayanıqlı inkişafa dəstək bəyanatını elan edib.
Bəyanat ““yaşıl” və dayanıqlı bankçılığın təşviqi”, “iqlim dəyişmələri ilə bağlı risklərin bank əməliyyatlarına inteqrasiyası”, “ESG Strategiyasının şəffaflığının və hesabatlılığının artırılması”, “dayanıqlı inkişaf üçün maraqlı tərəflərlə əməkdaşlıq”, “potensialın artırılmasına və innovasiyalara dəstək” adlı müddəalardan ibarət olub.
Zakir Nuriyev ayrı-ayrılıqda hər bir müddəaya toxunaraq bəyan edib:
1. ““Yaşıl” və dayanıqlı bankçılığın təşviqi
Azərbaycanda aşağı karbonlu, dayanıqlı iqtisadiyyata töhfə verən “yaşıl” layihələrə və dayanıqlı maliyyə təşəbbüslərinə dəstəyin artıracağıq. Bura ekoloji məsuliyyətli biznes təcrübələrini təşviq etmək üçün “yaşıl” kreditlər, dayanıqlılıqla əlaqəli kreditlər və ekoloji cəhətdən təmiz investisiya imkanları kimi bank məhsullarını hazırlanması və təklif edilməsi daxildir.
2. İqlim dəyişmələri ilə bağlı risklərin bank əməliyyatlarına inteqrasiyası
İqlim dəyişmələri ilə bağlı risklərin və imkanların risklərin idarə edilməsi çərçivələrimizə, kredit qərarlarımıza və strateji planlaşdırmamıza daxil edəcəyik. Bank fəaliyyətlərimizin milli və qlobal ekoloji məqsədlərə töhfə verməklə uzunmüddətli sabitliyi təmin edəcəyini bəyan edirik.
3. ESG Strategiyasının şəffaflığının və hesabatlılığının artırılması
Güclü “Ətraf mühit, sosial və idarəetmə (ESG) Strategiyası” qəbul etməklə bank fəaliyyətlərimizin şəffaflığının artırılması öhdəliyini götürürük. Kredit və investisiya portfellərimizin ətraf mühitə və cəmiyyətə təsirini ən qabaqcıl beynəlxalq təcrübələrə uyğun olaraq müntəzəm açıqlayacağımızı bəyan edirik.
4. Dayanıqlı inkişaf üçün maraqlı tərəflərlə əməkdaşlıq
Dayanıqlı iqtisadi inkişafı təşviq edən siyasət və təşəbbüsləri dəstəkləmək üçün tənzimləyicilər, siyasətçilər və digər maliyyə qurumları ilə sıx əməkdaşlıq edəcəyik. Biz bank sektorunun dayanıqlı gələcəyə töhfəsini artıran tərəfdaşlıqların qurulmasına kömək edəcəyimizi bəyan edirik.
5. Potensialın artırılmasına və innovasiyalara dəstək
Qurumlarımızda dayanıqlı maliyyə sahəsində potensialın və savadlılığın artırılmasına investisiya yatıracağıq. Biz dayanıqlı, iqlim dəyişmələrinə davamlı iqtisadiyyata keçidi dəstəkləyən bank xidmətlərində və texnologiyalarda innovasiyaları təşviq edəcəyik”.
Eyni zamanda Zakir Nuriyev çıxışda bəyanatın 6-cı müddəasından irəli gələrək qeyd edib ki, Azərbaycanın bank icması, 2030-cu ilədək Azərbaycanın dayanıqlı və aşağı karbonlu iqtisadiyyata keçidinə töhfə verəcək dayanıqlı və “yaşıl” layihələrin maliyyələşdirilməsinə 2 milyard manat vəsait ayıracaq.
Qeyd edək ki, noyabrın 11-dən başlayaraq Bakı nüfuzlu beynəlxalq tədbir olan COP29-a ev sahibliyi edir.
