Müəllif: Tamara Mustafayeva, Banco.az
Türkiyə Statistika Təşkilatı (TÜİK) mart ayı üzrə istehlakçı və istehsalçı qiymətləri indeksini açıqlayıb.
Banco.az xəbər verir ki, mart ayında istehlak qiymətləri aylıq olaraq 2,46 faiz artıb. İllik artım isə 38,10 faiz olaraq qeydə alınıb.
“Bloomberg HT” sorğusunda iştirak edən respondentlərin gözləntisi aylıq artımın 2,78 faiz, illik artımın isə 38,54 faiz olması istiqamətində idi.
Mart ayında illik əsas inflyasiya 37,42 faiz təşkil edib.
İstehsalçı qiymətləri eyni dövrdə aylıq olaraq 1,88 faiz artıb. İstehsalçı qiymətlərində illik artım isə 23,50 faiz olub.
Mart ayında illik baxımdan ən yüksək artım 80,42 faizlə təhsil qrupunda müşahidə olunub. Təhsili 68,63 faizlə mənzil və 46,74 faizlə spirtli içkilər və tütün qrupu izləyib.
Aylıq ən yüksək artım isə 9,96 faizlə spirtli içkilər və tütün qrupunda qeydə alınıb. Bu qrupu 4,94 faizlə qida və alkoqolsuz içkilər, 4,68 faizlə isə təhsil qrupu izləyib.
Mart ayında inflyasiyaya ən yüksək töhfə 1,23 faiz bəndi ilə qida və alkoqolsuz içkilərdən gəlib.
Bizi sosial şəbəkələrdən izləyin!!
