Müəllif:Mehin Qasımova,Banco.az
Botsvana tarixinin ən böyük və qiymətli almazlarından biri nəhayət satılıb.
Banco.az xəbər verir ki, 2488,32 karatlıq “Motsvedi” almazı 2024-cü ilin avqustunda ölkənin Karowe mədənində aşkarlanıb və təxminən iki il ərzində alıcı gözləyib.
Daş ilk tapıldıqda onun çəkisi 2492 karat olaraq açıqlanmışdı. Təmizlənib emal edildikdən sonra isə son çəkisinin 2488,32 karat olduğu müəyyənləşib.
Amerika Gemoloji İnstitutu “Motsvedi”ni indiyədək aşkarlanmış ikinci ən böyük qiymətli daş almazı hesab edir. Birinci yerdə 1905-ci ildə Cənubi Afrikada tapılan məşhur “Cullinan” almazı dayanır. Onun çəkisi 3106 karat olub.
Kanadanın Lucara Diamond şirkəti 2026-cı ilin ikinci rübünə dair hesabatında “Motsvedi”nin satışını təsdiqləyib. Şirkət almazın satışından əldə olunan məbləği açıqlamasa da, daşın hansı şəxsə və ya quruma satıldığı da məlum deyil.
Lucara Diamond-un rüblük ümumi gəliri isə 41 milyon dollar təşkil edib.
Nəhəng almazı satmaq niyə çətindir?
Bu ölçüdə və nadirlikdə almazların satışında əsas problem onların real bazar dəyərini müəyyənləşdirməkdir. Belə daşlar üçün bazarda hamının qəbul etdiyi vahid qiymətləndirmə meyarları yoxdur.
Almazı bütöv saxlamaq və onu unikal kolleksiya əşyası və ya muzey eksponatı kimi təqdim etmək mümkündür. Digər variant isə daşı bir neçə daha kiçik qiymətli almaza bölməkdir.
“Motsvedi” yalnız ölçüsü ilə deyil, keyfiyyəti ilə də diqqət çəkir. Gemoloji İnstitutu onu şəffaf, açıq qəhvəyi rəngli və qiymətli daş keyfiyyətinə malik almaz kimi təsvir edib.
Təxminən iki il ərzində alıcı gözləyən nəhəng almaz nəhayət yeni sahibini tapıb. Lakin onun neçəyə satıldığı və gələcəkdə harada nümayiş etdiriləcəyi hələlik sirr olaraq qalır.
