Müəllif:Mehin Qasımova,Banco.az

Qızılın qiyməti 2027-ci ildə yenidən rekord səviyyəyə yüksələrək bir troya unsiyası üçün 5 000 dollara yaxınlaşa bilər.

Banco.az xəbər verir ki, bu barədə “Euler” analitik şirkətinin araşdırmasında bildirilib.

Analitiklərin fikrincə, qlobal mərkəzi bankların qızıla yüksək tələbatı, birja ticarət fondlarına (ETF) investisiyaların bərpası və qızıl istehsalı xərclərinin artması qiymətlərin yüksəlməsini dəstəkləyən əsas amillərdir.

Araşdırmada qeyd olunur ki, geosiyasi gərginlik və inflyasiya riskləri də qızıl bazarına təsir göstərir. ABŞ-da pul siyasətinin sərtləşdirilməsi fonunda qiymətli metalın qiyməti münaqişənin başlanmasından bəri 21%, 2026-cı ilin yanvar ayının sonundakı zirvə ilə müqayisədə isə 23% azalıb.

Bununla belə, analitiklər qızıla tələbatın güclü qalacağını gözləyirlər. Belə ki, 2026-cı ilin iyul-sentyabr aylarında qlobal ETF-lərə qızıl investisiyalarının həcmi 211 tona çatıb. Mərkəzi bankların ehtiyatlarını şaxələndirməsi və dollar asılılığını azaltmaq istəyi də bu tendensiyanı dəstəkləyir.

Digər tərəfdən, qızıl hasilatının bahalaşması da qiymətlərə təsir edə bilər. “Euler”in hesablamalarına görə, neft qiymətləri hazırkı səviyyədə qalarsa, bəzi qızıl istehsalçılarının nağd xərcləri 2027-ci ilin əvvəlində bir unsiya üçün 3 000 dollara çata bilər.