Müəllif:Mehin Qasımova,Banco.az

İran müharibə və rekord inflyasiya ilə mübarizə apardığı bir vaxtda minimum əmək haqqını 60 faiz artırıb.

Banco.az xəbər verir ki, İranın əmək naziri Əhməd Meydari bazar ertəsi ölkədə minimum əmək haqqının 60 faiz artırıldığını təsdiqləyib.

Bu, aylıq baza əmək haqqının 103 milyon rialdan (67,5 avro ) 166 milyon riala (109 avro) qədər artırılmasını nəzərdə tutur.

Minimum əmək haqqının artırılması işçilərin  təzyiqinə birbaşa cavabdır və İran hakimiyyətinin cəmiyyəti sabitləşdirmək səylərini əks etdirir.

Fevral ayında İranın Statistika Mərkəzi inflyasiyanın 68,1 faiz olduğunu açıqladı ki, bu da İkinci Dünya Müharibəsindən bəri ən yüksək göstəricidir.

Aylıq inflyasiya 9,4 faizə yüksələrək 2022-ci il subsidiya islahatlarından bəri ən yüksək səviyyəyə çatıb.

Ərzaq qiymətləri illik müqayisədə 110 faiz artıb; artım çörək və dənli bitkilərdə 142 faizə, ətdə 117 faizə və bitki yağında 207 faizə çatıb.