Müəllif:Mehin Qasımova,Banco.az
ABŞ-da açıqlanan güclü məşğulluq göstəricilərinin faiz dərəcələrinin yüksək səviyyədə qalacağı ilə bağlı gözləntiləri artırması qızılın qiymətinə təzyiq göstərib.
Banco.az xəbər verir ki, spot qızılın qiyməti 0,5% azalaraq unsiya üçün 4 405,47 dollara düşüb. ABŞ qızıl fyuçersləri də 0,5% ucuzlaşaraq unsiya üçün 4 452,20 dollar təşkil edib.
Bazar iştirakçıları bu həftə açıqlanacaq ABŞ-ın əsas inflyasiya göstəricilərini gözləyirlər. İnvestorlar hesab edirlər ki, yeni məlumatlar Federal Ehtiyat Sisteminin (FED) qarşıdakı dövrdə pul siyasəti ilə bağlı qərarlarına dair daha aydın təsəvvür yaradacaq.
Məlumata görə, investorlar FED-in sentyabrın 15-16-da keçiriləcək iclasında faiz dərəcələrini artırması ehtimalını 58,4% qiymətləndirirlər.
Qızıl ənənəvi olaraq inflyasiyaya qarşı qorunma vasitəsi hesab olunur. Lakin faiz dərəcələrinin yüksəlməsi gəlir gətirməyən qızılı investorlar üçün daha az cəlbedici edir və bu da onun qiymətinə mənfi təsir göstərir.
ABŞ Prezidenti Donald Tramp isə cümə günü bildirib ki, FED faiz dərəcələrini aşağı salmasa, ABŞ ticarət kəsiri olan ölkələrlə ticarəti dayandıra bilər.
Digər qiymətli metallar da gün ərzində ucuzlaşıb. Spot gümüşün qiyməti 0,2% azalaraq unsiya üçün 66,03 dollara, platin 0,8% azalaraq 1 805,53 dollara, palladium isə 0,7% azalaraq 1 396,08 dollara düşüb.
