Müəllif: Gülnar Əhmədli, Banco.az
Azərbaycanın biznes mühiti tədricən yaxşılaşır.
Banco.az xəbər verir ki, bu barədə beynəlxalq sığortaçı və aktiv idarəetmə qrupu "Allianz Group"un məlumatında qeyd edilib.
Bildirilib ki, bu, dövlət müəssisələrinin idarəçiliyində islahatlar, faydalı sahibkarlıq şəffaflığı və rəqəmsallaşma hesabına baş verir.
Lakin tənzimləyici keyfiyyət, hüquq və korrupsiyaya qarşı mübarizə hələ də regiondakı ölkələrdən geri qalır və bu da xarici investisiyaların və özəl sektorun artımının qarşısını alan səbəblərdəndir.
Həmçinin, vurğulanıb ki, dövlətin iqtisadiyyatda böyük paya malik olması və maliyyə bazarlarının dərinliyinin aşağı səviyyədə qalması rəqabəti və innovasiyaları məhdudlaşdırır.
"Bərpa olunan enerji və infrastruktur sahəsində irəliləyiş diqqətəlayiqdir, bir neçə külək və günəş enerjisi layihəsi istismara verilmə mərhələsinə çatıb və ötürücü şəbəkədə təkmilləşdirmə işləri aparılır. Bununla belə, ətraf mühitin dayanıqlılığı hələ də çətinlik olaraq qalır, suyun idarə edilməsi və təkrar emalında göstəricilər aşağıdır. Yaşıl enerjiyə, regional bağlantıya və insan kapitalının inkişafına diqqətin davamlı olması uzunmüddətli rəqabət üçün vacibdir", - məlumatda qeyd edilib.
Bizi sosial şəbəkələrdən izləyin!!
