Müəllif: Tamara Mustafayeva, Banco.az
Almaniyanın biznes perspektivləri gözləntiləri üstələyib.
Banco.az xəbər verir ki, “İfo” İnstitutunun proqnozlar indeksi yanvar ayında yenilənmiş 89,6 səviyyəsindən 90,5-ə yüksəlib. “Bloomberg” analitikləri göstəricinin 90 səviyyəsində olacağını proqnozlaşdırırdılar. Cari vəziyyətə dair göstərici də gözləntilərlə müqayisədə daha nəzərəçarpacaq yaxşılaşma nümayiş etdirib.
“İfo”nun prezidenti Klemens Fuest açıqlamasında bildirib: “Alman iqtisadiyyatı bərpanın ilk əlamətlərini göstərir. Şirkətlər mövcud iş vəziyyətindən razıdırlar. Gözləntilər də müsbət istiqamətdə inkişaf edib.”
Almaniyanın iqtisadi perspektivləri infrastruktur və müdafiə sahələrinə yönəldilən iri həcmli dövlət investisiyalarının uğurundan, eləcə də ABŞ-nin yüksək rüsum siyasəti və çinli istehsalçılarla rəqabətə qarşı həyata keçiriləcək islahatlardan asılıdır.
Ümumi daxili məhsul ötən il 2022-ci ildən bəri ilk dəfə artım göstərsə də, artım tempi cəmi 0,2 faiz olub. ABŞ Ali Məhkəməsinin ABŞ Prezidenti Donald Tramp tərəfindən tətbiq edilən vergiləri ləğv etməsindən sonra yaranan son ticarət gərginlikləri mövcud risklərin davam etdiyini göstərir.
Almaniyanın emal sənayesinin 2022-ci ildən bəri ilk dəfə genişlənmə qeydə alması müsbət siqnal kimi qiymətləndirilir. Almaniya Mərkəzi Bankı (“Bundesbank”) isə cari rübdə zəif dinamikanın müşahidə olunmasına baxmayaraq, yaz aylarından etibarən ümumi daxili məhsulun daha dinamik artacağını proqnozlaşdırır.
Bizi sosial şəbəkələrdən izləyin!!
