Müəllif:Mehin Qasımova,Banco.az

Yaponiya iqtisadiyyatı 2025-ci ilin dördüncü rübündə proqnozlardan daha zəif artım nümayiş etdirib.

Banco.az xəbər verir ki, hökumətin ilkin məlumatlarına əsasən, ölkənin ÜDM-i oktyabr-dekabr aylarında əvvəlki rüblə müqayisədə cəmi 0,1% artıb. Halbuki, Trading Economics məlumatına görə, analitiklər orta hesabla 0,4% artım gözləyirdilər.

Yenidən baxılmış statistikaya əsasən, üçüncü rübdə iqtisadiyyat əvvəl elan olunan 0,6% deyil, 0,7% azalıb.

Ölkə iqtisadiyyatının yarıdan çoxunu təşkil edən istehlak xərcləri dördüncü rübdə 0,1% artaraq ilin ən aşağı səviyyəsinə enib. Bu göstərici əvvəlki rübdə 0,4% idi. Dövlət xərcləri də əvvəlki rüblə müqayisədə dəyişməyərək 0,1% artım göstərib.

Biznes kapitalı investisiyaları iyul-sentyabr aylarında 0,3% azaldıqdan sonra oktyabr-dekabr dövründə 0,2% artıb.

Xarici ticarət göstəriciləri də zəif dinamika nümayiş etdirib. İxrac əvvəlki rübdə 1,4% azaldıqdan sonra daha 0,3% geriləyib. İdxal isə 0,3% azalıb (üçüncü rübdə azalma 0,1% olmuşdu).

İllik ifadədə isə Yaponiyanın ÜDM-i dördüncü rübdə 0,2% artıb. Üçüncü rübdə isə əvvəllər açıqlanan 2,3% azalma göstəricisi 2,6% azalma olaraq yenidən qiymətləndirilib.

Beləliklə, zəif daxili tələbat və ixracın azalması Yaponiya iqtisadiyyatında bərpa prosesinin hələ də kövrək olduğunu göstərir.