Bazarda ən yaxşı məhsula və ya xidmətə sahib olmaq kifayət deyil. Əgər onu doğru auditoriyaya çatdırmaq üçün təsirli marketinq strategiyanız yoxdursa, uğur qazanmaq çətin olacaq. Banco.az xarici KİV-ə istinadən bu istiqamətdə əsas addımları təqdim edir:
İlk addım marketinq strategiyanızın məqsəd və vəzifələrini müəyyən etməkdir. Bu fəaliyyət və hədəflər biznesin ümumi məqsədlərinə uyğun olmalıdır. Məqsədləri müəyyənləşdirmək üçün SMART məqsəd şablonundan istifadə tövsiyə edilir. Bu metod hədəfləri müəyyən etməyə kömək edən vasitədir. Erkən qoyulan məqsədlər marketinq strategiyasına istiqamət verəcək və onun uğurunu ölçməyə kömək edəcək. Şablon xüsusi, ölçülə bilən, əldə edilə bilən, müvafiq və zamana bağlı kimi kateqoriyalar üzrə doldurulur.
Hədəf auditoriyanızı dərindən tanımaq və anlamaq da marketinq strategiyasının əsas məsələlərindən biridir. "Onlar kimdir?", "Nələrə üstünlük verirlər?" kimi suallara cavab tapmaq, onların demoqrafik xüsusiyyətlərini, maraqlarını, ehtiyaclarını və davranışlarını öyrənmək vacibdir. Bunun üçün hərtərəfli bazar araşdırması aparmaq və alıcı personajları yaratmaq lazımdır.
Digər bir vacib addım rəqabət analizidir. Bu yanaşma, bazarda mövcud olan digər məhsul və xidmətlərin, hədəf auditoriyasının diqqətini cəlb etmək üçün rəqiblərin istifadə etdiyi marketinq taktikalarının və ümumilikdə bazardakı rəqabət gücünün daha yaxşı anlaşılmasını təmin edir.
Hər bir effektiv marketinq strategiyasının aydın unikal dəyər təklifi (UDT) olmalıdır. Bu, şirkətin, məhsulun və ya xidmətin müştərilərə təqdim etdiyi unikal faydanı izah edən bəyanatdır. "Məhsul və ya xidmətinizi rəqiblərdən fərqləndirən nədir?" və "Müştərilər niyə məhz sizin brendinizə maraq göstərməlidir?" kimi suallara verilən cavablar cəlbedici UDT yaratmağa kömək edir.
Marketinq kanallarının düzgün seçilməsi də mühüm əhəmiyyət kəsb edir. Auditoriyaya ən uyğun platforma və üsullar müəyyən edilməli, mesaj hədəf auditoriyasına ən effektiv şəkildə çatdırılmalıdır. Sosial media, SEO, e-poçt marketinqi kimi rəqəmsal vasitələrdən tutmuş televiziya, radio, jurnal və qəzet reklamlarına qədər hər bir kanalın seçimi auditoriyanın xüsusiyyətlərinə uyğunlaşdırılmalıdır. Beləliklə, şirkət öz məhsul və xidmətlərini düzgün auditoriyaya təsirli şəkildə çatdırmağa nail olur.
Ən vacib məsələlərdən biri də marketinq büdcəsidir. Büdcənin istifadəsi əsasən seçilən marketinq kanallarından asılıdır. Məsələn, video kampaniyalar və TV reklamları üçün böyük büdcə tələb olunsa da, sosial media yazıları, SEO və e-poçt marketinqi daxili idarə edildikdə daha az maliyyə resursu tələb edə bilər.
Strategiya inkişaf etdikcə, birinci addımda müəyyən edilmiş məqsədlərə və ölçülərə əsasən performans izlənməlidir. Bu ölçüləri davamlı təhlil etməklə işlərin nə qədər yaxşı getdiyini görmək və məqsədlərə ən uğurlu şəkildə çatmaq üçün lazım gəldikdə xüsusi düzəlişlər etmək vacibdir.
