Müəllif - Fərid İslamov - Banco.az

 UBS Investment Bank-ın baş strateqi Bhanu Baveja hesab edir ki, S&P 500 fond indeksi yaxın üç-dörd ay ərzində Amerika istehlakçılarının əhvalının pisləşməsi fonunda 5300 bəndə qədər enə bilər.

24 mart tarixində bu göstərici 5767,57 bənd səviyyəsində bağlandı. Proqnoz bu göstəricidən 9%-lik bir enişi nəzərdə tutur.

Baveja, ABŞ-da məşğulluq və xərclər ilə bağlı gözləntilərin, həmçinin istehlakçı inamının pisləşdiyini qeyd edib.

“Əgər üç ay əvvəl kimsə ABŞ iqtisadiyyatının zəifləyəcəyini desəydi, ona gülərdilər, - deyə ekspert bildirib. - İndi isə miqrant çatışmazlığı və əlavə fiskal stimulların olmaması məlumatlarda öz əksini tapır.”

Bununla yanaşı, UBS Amerika istiqrazlarına müsbət baxır, çünki iqtisadiyyatın yavaşlaması inflyasiya risklərini azaldır. Baveja hesab edir ki, ABŞ-ın ikiillik dövlət istiqrazları hazırda onillik istiqrazlara nisbətən daha cəlbedicidir, çünki uzunmüddətli qiymətli kağızlar xarici investorların Amerika dövlət borcuna olan tələbinin azalması səbəbindən təzyiq altında qalır.