Müəllif: Tamara Mustafayeva, Banco.az
“Instagram” platforması yeni video yaratma tətbiqi olan “Edits”i təqdim edib.
Banco.az xəbər verir ki, "Meta" şirkətinə bağlı sosial media platforması "Instagram", "ByteDance" şirkətinin video redaktə tətbiqi olan "CapCut"un, "TikTok" qadağası çərçivəsində "Apple"ın "App Store" və "Google Play Store"dan çıxarılmasından sonra "Edits" adlı yeni bir video redaktə tətbiqini elan edib.
"Instagram"ın rəhbəri Adam Mosseri "Threads"də tətbiqin gələn ay "iOS" platformasında istifadəyə veriləcəyini və daha sonra "Android" versiyasının da buraxılacağını bildirib.
Mosseri paylaşımında, "Hazırda dünyada çox şey baş verir, amma nə olursa olsun, təkcə “Instagram” deyil, bütün platformalar üçün video hazırlayan sizə ən maraqlı alətləri yaratmağı öz missiyamız hesab edirik," ifadələrini işlədib.
Mosseri qeyd edib ki, tətbiqdə ilham üçün xüsusi bir bölmə, ideyaları izləmək üçün bir bölmə və yüksək keyfiyyətli kamera daxil olmaqla bir sıra yaradıcı alətlər olacaq. Bundan əlavə, yaradılan məzmunların qaralama versiyalarını dostlarınız və ya əməkdaşlarınızla bölüşmək imkanı da təmin ediləcək. O, həmçinin əlavə edib ki, məzmun yaradıcıları "Edits" vasitəsilə hazırladıqları videoların "Instagram"da yayımlandıqdan sonra necə performans göstərdiyinə dair məlumatlara baxa biləcəklər.
Şirkət 2023-cü ildə "X" kimi mətn əsaslı sosial şəbəkələrə rəqib olan "Threads"i də bazara təqdim etmişdi. Şirkət ehtimal edir ki, bir çox video yaradıcıları "CapCut" tətbiqinin yoxluğunda başqa bir vasitə sınayacaq. "Apple" "TikTok"un ABŞ-da qadağan olunması ilə "ByteDance" tərəfindən hazırlanan bir çox tətbiqi "App Store"dan çıxarıb. Şirkət rəsmi dəstək sənədi yayımlayaraq qadağan olunmuş tətbiqlərin siyahısını paylaşıb.
Digər tərəfdən, ABŞ-ın seçilmiş prezidenti Donald Trump sosial media platformasında "TikTok" qadağası ilə bağlı, "Bazar ertəsi günü, qanunun müddəalarının qüvvəyə minmə müddətini uzadacaq bir fərman yayımlayacağam ki, milli təhlükəsizliyimizi qorumaq üçün razılaşma əldə edə bilək," açıqlamasını verib.
Bizi sosial şəbəkələrdən izləyin!!
