Müəllif - Eldar Kərimov - Banco.az

Frankmedia - Moskva Ukraynanın bərpası üçün 300 milyard dollarlıq dondurulmuş suveren aktivlərdən istifadə imkanını nəzərdən keçirir, lakin bu vəsaitlərin bir hissəsinin Rusiya nəzarətində olan ərazilərə yönəldilməsində israr edir, Reuters-ə üç mənbə bildirib.

Rusiya və ABŞ arasında danışıqlar ilk dəfə fevralın 18-də Səudiyyə Ərəbistanında üz-üzə keçirilib və həm ABŞ prezidenti Donald Tramp, həm də Rusiya lideri Vladimir Putin yaxın zamanda görüşmək istədiklərini ifadə ediblər.

Rusiya-Ukrayna münaqişəsinin başlamasından sonra Qərb Rusiyanın 300-350 milyard dollarlıq aktivlərini, əsasən Avropa, ABŞ və Böyük Britaniyada bloklayıb. Hazırda Moskvada bu ehtiyatların əhəmiyyətli hissəsinin mümkün sülh razılaşması çərçivəsində Ukraynanın bərpası üçün istifadə edilməsi variantı müzakirə olunur.

Ukraynanın şərqindəki dağıdılmış bölgələr böyük investisiyalar tələb edir: Dünya Bankının qiymətləndirməsinə görə, ölkənin bərpası 486 milyard dollara başa gələcək və vəsaitlərin bölüşdürülməsi məsələsi hələ də açıq qalır, agentlik yazır. Mənbələrdən biri qeyd edir ki, Rusiya dondurulmuş aktivlərin üçdə ikisinin Ukraynanın bərpasına ayrılmasına razı ola bilər, əgər onların istifadəsinin şəffaflığına dair zəmanətlər verilərsə. Qalan vəsaitlər Rusiya ərazilərinin, o cümlədən yeni regionların bərpasına sərf oluna bilər.

Hazırda Ər-Riyadda keçirilən görüşdə bu məsələnin müzakirə edilib-edilmədiyi bəlli deyil, lakin bu ideya, xüsusilə Tramp administrasiyasının ABŞ-ın Kiyevə yardımı qarşılığında Ukraynanın təbii sərvətlərinə çıxış əldə etmək istəyi fonunda kompromis üçün başlanğıc nöqtəsi ola bilər, Reuters vurğulayır. Rusiya rəhbərliyi daha əvvəl aktivlərdən istifadə planlarını “soyğunçuluq” adlandırmışdı, lakin ölkə daxilində bu məsələ ilə bağlı danışıqlara hazır olunduğuna dair siqnallar ortaya çıxır.