Müəllif: Tamara Mustafayeva, Banco.az
Pentaqonun bildirdiyinə görə, DOGE-nin ilkin araşdırmasına görə, təxminən 80 milyon dollar qənaət əldə edilə bilər.
Banco.az xəbər verir ki, ABŞ Müdafiə Nazirliyi (Pentaqon) Hökumət Səmərəliliyi Departamenti (DOGE) tərəfindən aparılan ilkin araşdırmada "müxtəliflik, bərabərlik və inklüzivlik" (DEI) proqramlarına ayrılan xərclərin ləğvi ilə təxminən 80 milyon dollar qənaət edilə biləcəyinin müəyyən edildiyini açıqlayıb.
Nazirliyin “X” hesabında Pentaqon sözçüsü Şon Parnellin mövzu ilə bağlı açıqlamalarının yer aldığı bir video paylaşılıb.
Sözçü Parnell paylaşımda bildirib ki, nazirlik "israfçı xərclərin" azaldılması məqsədilə İlon Maskın rəhbərlik etdiyi DOGE ilə əməkdaşlıq edir və aparılan ilkin araşdırmalar nəticəsində təxminən 80 milyon dollar qənaət edilə biləcəyinin aşkarlandığını vurğulayıb.
Parnell qeyd edib ki, DOGE tərəfindən müəyyən edilən Pentaqon xərclərinə əsasən DEI proqramları və iqlim dəyişikliyi araşdırmalarına ayrılan milyonlarla dollar daxildir. Bunlara Hərbi Hava Qüvvələrində DEI transformasiyası və təlimləri üçün xərclənən 1,9 milyon dollar, eləcə də Afrikada iqlim təhlükələrinə qarşı dayanıqlılıq və sosial-institusional risklərin araşdırılması üçün Florida Universitetinə ayrılan 1,6 milyon dollar da daxildir.
Bu xərclərin "ordunun əsas funksiyalarına aid olmadığını" vurğulayan Parnell, "Bizim işimiz bu deyil. Bu cür məsələlər əsas missiyamızdan uzaqlaşmağımıza səbəb olur" ifadələrini işlədib.
Bizi sosial şəbəkələrdən izləyin!!
