Müəllif:Mehin Qasımova,Banco.az

ABŞ-ın texnologiya nəhəngi "Meta" uzunmüddətli süni intellekt  infrastruktur yol xəritəsini inkişaf etdirmək məqsədilə "Nvidia" ilə çoxillik strateji tərəfdaşlıq barədə razılığa gəldiyini açıqlayıb.

Şirkətin bəyanatında qeyd olunub ki, "Nvidia" texnologiyalarının genişmiqyaslı tətbiqi mövcud əməkdaşlığı daha da gücləndirəcək. Bu çərçivədə "Meta" əsas biznes əməliyyatları ilə yanaşı, süni intellektin təlimi və nəticə çıxarma (inference) prosesləri üçün optimallaşdırılmış məlumat mərkəzlərinin yaradılmasını planlaşdırır.

Açıqlamaya görə, yeni infrastruktur həlləri vatt başına performans göstəricilərində əhəmiyyətli irəliləyişlər təmin edəcək. Bu isə daha səmərəli və genişmiqyaslı süni intellekt əməliyyatlarının həyata keçirilməsinə imkan yaradacaq.

Meta həmçinin "WhatsApp" platformasında “Nvidia Məxfi Hesablama” (Confidential Computing) texnologiyasından istifadə edəcəyini bildirib. Şirkət bu addımın süni intellektlə işləyən funksiyaların aktivləşdirilməsinə və istifadəçi məlumatlarının məxfiliyinin qorunmasına xidmət edəcəyini vurğulayıb.

Bundan əlavə, "Meta" süni intellekt miqyaslı şəbəkə imkanlarını genişləndirmək, istifadənin səmərəliliyini artırmaq və enerji effektivliyini yüksəltmək üçün infrastruktur boyunca “Nvidia Spectrum-X Ethernet” şəbəkə platformasından yararlanacağını açıqlayıb.

Qeyd edək ki, son illər texnologiya şirkətləri arasında süni intellekt infrastrukturu üzrə tərəfdaşlıqlar sürətlə artır və bu istiqamətdə rəqabət daha da güclənir.