Müəllif:Mehin Qasımova,Banco.az
Avstraliyanın ən böyük banklarından biri olan National Australia Bank (NAB) 14 il ərzində əməkhaqqı hesablamalarında yol verdiyi səhvlərə görə 65 999 hazırkı və keçmiş işçisinə ümumilikdə 169 milyon dollar kompensasiya ödəyəcək.
Banco.az xəbər verir ki, məlumata görə, 2012–2026-cı illər ərzində bank əməkhaqqı hesablamaları və əmək müqavilələrinin düzgün tətbiq edilməməsi səbəbindən minlərlə əməkdaşına çatmalı olan ödənişləri tam həyata keçirməyib.
Pozuntulara əlavə iş saatlarının, illik məzuniyyət hüquqlarının, işdənçıxarma müavinətlərinin və pensiya ödənişlərinin düzgün hesablanmaması daxildir. Bank həmçinin bəzi hallarda işçilərin iş saatlarını və məzuniyyət qalıqlarını dəqiq qeydə ala bilməyib.
Bu hallar tam ştatlı, yarımştatlı və müvəqqəti işçilərə, eləcə də müxtəlif idarəetmə vəzifələrində çalışan əməkdaşlara təsir edib.
NAB indiyədək müəyyən edilmiş səhvlərin əksəriyyətini aradan qaldıraraq işçilərinə ən azı 155 milyon dollar geri ödəyib. Kompensasiya proqramının ümumi məbləğinin isə 169 milyon dollara çatacağı gözlənilir.
