Müəllif:Mehin Qasımova,Banco.az

ABŞ-ın çip istehsalçısı "Intel" çip istehsalının genişləndirilməsi və yeni investisiyaların maliyyələşdirilməsi məqsədilə səhm satışı yolu ilə 15 milyard dollar toplamağı planlaşdırdığını açıqlayıb.

Banco.az xəbər verir ki, şirkət  çip istehsalı bazarında "TSMC" kimi sənaye liderləri ilə rəqabət aparmaq üçün yeni istehsal müəssisələrinə və qabaqcıl qablaşdırma imkanlarının inkişafına böyük sərmayələr yatırır.

Xəbərdən sonra "Intel" səhmləri ticarətin ilk saatlarında 4%-dən çox ucuzlaşıb. Bununla belə, şirkətin səhmləri son dövrdəki yüksəlişini nəzərə alsaq, hələ də əhəmiyyətli artım nümayiş etdirib. Intel-in səhmlərinin bahalaşması şirkətin kapital artımı yolu ilə genişlənmə planlarını maliyyələşdirə biləcəyi ilə bağlı gözləntiləri də gücləndirmişdi.

Intel-in səhmləri əvvəlki dövrdə təxminən üç dəfə bahalaşaraq "AMD" və "Nvidia" kimi rəqibləri, eləcə də təxminən 75% yüksələn Philadelphia Semiconductor Index-i geridə qoyub.

Bir sıra analitiklər də "Intel" səhmlərindəki güclü artımın şirkətin yeni səhmlər buraxaraq əlavə kapital cəlb etməsi ehtimalını artırdığını bildiriblər.

Şirkətin 15 milyard dollarlıq kapital cəlbi Intel-in istehsal gücünü artırmaq, yeni texnologiyalara investisiya qoymaq və qlobal çip istehsalı bazarında rəqabət qabiliyyətini gücləndirmək strategiyasının əsas maliyyə addımlarından biri olacaq.