Müəllif: Tamara Mustafayeva, Banco.az
“Google” süni intellekt modellərini mobil telefonlara endirməyə və işlətməyə imkan verən “Google AI Edge Gallery” adlı tətbiqi istifadəyə verib.
Banco.az xəbər verir ki, əvvəlcə Android üçün istifadəyə verilən və yaxın zamanda iOS platformasına da gəlməsi gözlənilən bu tətbiq istifadəçilərə Hugging Face platformasında əlçatan olan açıq mənbəli süni intellekt modellərini birbaşa telefonlarında işlətməyə imkan verir.
İnternetsiz süni intellekt təcrübəsi
Tətbiqin ən diqqətçəkən xüsusiyyəti modellərin internetə ehtiyac olmadan, tamamilə cihaz üzərində işləyə bilməsidir. Görüntü yaratmaq, sualları cavablandırmaq, mətn redaktə etmək və ya kod yazmaq kimi bir çox funksiyanı yerinə yetirə bilən bu modellər cihazın prosessorundan istifadə edərək oflayn rejimdə işləyir.
Buludda işləyən süni intellekt modelləri adətən yerli modellərlə müqayisədə daha güclü olurlar, lakin bəzi çatışmazlıqları da mövcuddur. Bəzi istifadəçilər şəxsi və ya həssas məlumatlarını uzaqdakı bir məlumat mərkəzinə göndərmək istəməyə bilər və ya süni intellekt modellərinə Wi-Fi və ya mobil şəbəkəyə ehtiyac olmadan daxil olmaq istəyirlər.
“Google”un “eksperimental Alfa versiyası” adlandırdığı “Google AI Edge Gallery” verilmiş təlimatları izləyərək GitHub üzərindən endirilə bilər. Əsas ekran “Şəkildən soruş” və “AI ilə söhbət” kimi süni intellekt tapşırıqları və funksiyalarına qısa yollar təqdim edir. Hər hansı bir funksiyaya toxunduqda, məsələn, “Google”un Gemma 3n modeli kimi uyğun modellərin siyahısı açılır.
Digər bir xüsusiyyət isə “Prompt Lab” bölməsidir. Bu hissədə süni intellektdən nə istədiyinizi daha ətraflı şəkildə təyin edə bilər və müxtəlif tapşırıqlar üçün hazır şablonlardan istifadə edə bilərsiniz. “Google” qeyd edir ki, tətbiqin performansı telefonunuzun gücündən asılı olaraq dəyişə bilər.
Bizi sosial şəbəkələrdən izləyin!!
