Müəllif - Eldar Kərimov - Banco.az

Beynəlxalq "Fitch Ratings" agentliyi Yapon avtomobil istehsalçısı "Nissan Motor Co."nun uzunmüddətli emitent defolt reytinqini (RDE) "BBB-" səviyyəsindən "BB+"-a endirib və "mənfi" proqnoz qoyub.

İndi şirkətin reytinqi investisiya səviyyəsindən kənar, yəni "zibil" kateqoriyasında yerləşir.

"Bu endirim şirkətin davamlı olaraq aşağı gəlirliliyini əks etdirir ki, bu da bizim gözləntilərimizdən daha yavaş bərpa olunur," - deyə agentliyin mətbuat relizində qeyd olunub.

"Fitch"in ekspertləri proqnozlaşdırır ki, avtomobil bölməsində EBIT göstəriciləri və sərbəst pul axını 2026-cı ilin martında başa çatan maliyyə ilinin sonuna qədər mənfi olaraq qalacaq. Eyni zamanda, şirkətin güclü likvidliyi və balans hesabatları qısamüddətli perspektivdə kapital axınından qorunma təmin edir.

"Mənfi" proqnoz "Nissan"ın restrukturizasiya planının həyata keçirilməsi ilə bağlı qeyri-müəyyənliyi əks etdirir.

"Biz plan çərçivəsində xərclərin ağlabatan şəkildə azaldılmasını gözləyirik, lakin gəlirlər və xərclər, ehtimal ki, ABŞ-ın gömrük rüsumlarından, ABŞ və Cənub-Şərqi Asiyada avtomobil satışlarının zəifliyindən təsirlənəcək," - deyə mətbuat relizində vurğulanıb.

"Fitch"in analitikləri, əgər bu planın icrasında irəliləyiş olmasa, şirkətə qarşı mənfi reytinq tədbirlərinin görülə biləcəyini ehtimal edirlər.