Müəllif:Mehin Qasımova,Banco.az
Birləşmiş Millətlər Təşkilatının İnkişaf Proqramı (BMTİP) və Oksford Universitetinin tədqiqatçıları tərəfindən hazırlanan hesabatda dünyada 1,2 milyard insanın ifrat yoxsulluq şəraitində yaşadığı bildirilib.
Banco.az xəbər verir ki, hesabatda ifrat yoxsulluğun yalnız maddi çətinliklərlə məhdudlaşmadığı vurğulanıb. Belə şəraitdə yaşayan insanlar aclıq, təhsilə məhdud çıxış, təmiz içməli su və elektrik enerjisinin olmaması kimi ciddi problemlərlə üzləşirlər. Ən narahatedici məqamlardan biri isə yoxsulluq içində yaşayan insanların yarıdan çoxunun uşaqlardan ibarət olmasıdır.
BMTİP-nin rəhbəri Aleksandr De Kru yoxsulluq probleminin miqyasını bütün dünya üçün ciddi xəbərdarlıq kimi qiymətləndirib.
Hesabatda əhali artımının yoxsulluq içində yaşayan insanların sayına təsir edən amillərdən biri olduğu qeyd edilib. Bununla belə, araşdırma 108 inkişaf etməkdə olan ölkəni əhatə etsə də, əhali artımı ilə bağlı müqayisə aparmaq üçün yalnız 13 ölkə üzrə məlumatların mövcud olduğu bildirilib. Bu səbəbdən nəticələri qiymətləndirərkən məlumat məhdudiyyətləri də nəzərə alınmalıdır.
Bununla yanaşı, bəzi ölkələrdə yoxsulluğun azaldılması istiqamətində müsbət nəticələr əldə edilib. Son 15 ildə 33 ölkədə çoxölçülü yoxsulluq meyarlarına əsasən ağır şəraitdə yaşayan əhalinin payı iki dəfə azalıb. Çin və Vyetnam da bu ölkələr sırasındadır.
Bununla belə, yoxsulluq problemi əsasən Saharaaltı Afrika və Cənubi Asiyada kəskin olaraq qalır.
Hesabata əsasən, Misir, Nepal və Tacikistanda həm yoxsulluq səviyyəsi, həm də yoxsulluqdan əziyyət çəkən insanların sayı əhəmiyyətli dərəcədə azalıb. Anqola və Zambiyada isə fərqli mənzərə müşahidə olunub. Bu ölkələrdə yoxsulluq səviyyəsi aşağı düşsə də, əhalinin sürətlə artması nəticəsində yoxsulluq içində yaşayan insanların ümumi sayı yüksəlib.
