Müəllif: Gülnar Əhmədli, Banco.az
1930-cu ildə ilk dəfə keçirilən FIFA Dünya Kuboku bu günə qədər cəmi 19 ölkədə təşkil olunub. Halbuki turnir hər dörd ildən bir milyardlarla futbol azarkeşi tərəfindən izlənilir və dünyanın ən möhtəşəm idman tədbirlərindən biri hesab olunur.
Banco.az xəbər verir ki, Top End Sports platformasının məlumatları əsasında hazırlanan qrafik 2026-cı ilə qədər Dünya Kubokuna ev sahibliyi edən bütün ölkələri əks etdirir.
Məlumatlar göstərir ki, Meksika üç dəfə turnirə ev sahibliyi etməklə siyahıya başçılıq edir. Avropa isə doqquz ölkədə keçirilən ümumilikdə 11 Dünya Kuboku ilə ən çox ev sahibi olan region olaraq qalır. FIFA-nın son illərdə çoxölkəli təşkilatçılığa üstünlük verməsi isə bu tendensiyanın gələcəkdə daha da güclənəcəyini göstərir.
Dünya Kubokuna hansı ölkələr ev sahibliyi edib?
Dünya Kuboku qlobal miqyaslı yarış olsa da, turnirə ev sahibliyi etmək imkanı indiyədək məhdud sayda ölkəyə nəsib olub. 1930-cu ildən bəri cəmi 19 ölkə bu hüququ qazanıb və onların bir neçəsi turniri bir neçə dəfə qəbul edib.
-
Meksika – 3 dəfə (1970, 1986, 2026)
-
ABŞ – 2 dəfə (1994, 2026)
-
Almaniya – 2 dəfə (1974, 2006)
-
İtaliya – 2 dəfə (1934, 1990)
-
Braziliya – 2 dəfə (1950, 2014)
-
Fransa – 2 dəfə (1938, 1998)
-
Kanada – 1 dəfə (2026)
-
Qətər – 1 dəfə (2022)
-
Rusiya – 1 dəfə (2018)
-
Cənubi Afrika – 1 dəfə (2010)
-
Yaponiya – 1 dəfə (2002)
-
Cənubi Koreya – 1 dəfə (2002)
-
İspaniya – 1 dəfə (1982)
-
Argentina – 1 dəfə (1978)
-
İngiltərə – 1 dəfə (1966)
-
Çili – 1 dəfə (1962)
-
İsveç – 1 dəfə (1958)
-
İsveçrə – 1 dəfə (1954)
-
Uruqvay – 1 dəfə (1930)
Meksika 2026-cı ildə üçüncü dəfə Dünya Kubokuna ev sahibliyi etməklə bu göstəricidə rekordçu olacaq. Ondan sonra Almaniya, Fransa, İtaliya, Braziliya və ABŞ gəlir. Bu ölkələrin hər biri turniri iki dəfə qəbul edib.
Regional bölgüyə nəzər saldıqda isə Avropa açıq üstünlüyə malikdir. Almaniya, Fransa, İtaliya, İspaniya, İngiltərə, İsveç, İsveçrə və Rusiyada ümumilikdə 11 Dünya Kuboku keçirilib. Cənubi Amerika beş dəfə turnirə ev sahibliyi edib. Asiya və Afrika isə Dünya Kubokunu yalnız XXI əsrdə qəbul etməyə başlayıb.
FIFA ev sahibi ölkələri necə seçir?
Dünya Kubokuna ev sahibliyi etmək uğrunda rəqabət ildən-ilə güclənir. FIFA namizəd ölkələri stadionların tutumu, nəqliyyat infrastrukturu, yerləşdirmə imkanları, təhlükəsizlik tədbirləri, maliyyə təminatı və davamlı inkişaf layihələri kimi bir sıra meyarlar əsasında qiymətləndirir.
Son onilliklərdə qurum turnirin coğrafiyasını genişləndirməyə də xüsusi diqqət ayırıb. 2010-cu ildə Cənubi Afrika Dünya Kubokunu qəbul edən ilk Afrika ölkəsi oldu. 2018-ci ildə Rusiya, 2022-ci ildə isə Qətər turnirə ev sahibliyi edərək Yaxın Şərqdə ilk Dünya Kubokunu təşkil etdi. Bu seçimlər FIFA-nın yarışın qlobal əhatəsini genişləndirmək strategiyasının bir hissəsi hesab olunur.
Turnirin miqyası böyüdükcə birgə ev sahibliyi modeli də daha çox tətbiq edilir. ABŞ, Meksika və Kanadanın birgə təşkil etdiyi 2026-cı il Dünya Kubokunda rekord sayda – 48 milli komanda iştirak edəcək və 100-dən çox oyun keçiriləcək.
Dünya Kubokuna ev sahibliyinin gələcəyi
Dünya Kubokunun təşkili modeli son illərdə ciddi dəyişikliklərə məruz qalır. Turnirin genişlənməsi və infrastruktur tələblərinin artması səbəbindən FIFA artıq tək ölkədən daha çox, bir neçə dövlətin birgə müraciətlərinə üstünlük verir.
2026-cı ildən sonrakı iki Dünya Kubokunun ev sahibləri artıq müəyyənləşib. 2030-cu il Dünya Kuboku İspaniya, Portuqaliya və Mərakeşdə keçiriləcək. Turnirin 100 illiyi münasibətilə ilk Dünya Kubokunun keçirildiyi Uruqvayda, həmçinin Argentina və Paraqvayda yubiley oyunları təşkil olunacaq. FIFA bu altı ölkənin ev sahibliyini 2024-cü ilin sonunda rəsmən təsdiqləyib.
2034-cü ildə isə Dünya Kubokuna Səudiyyə Ərəbistanı ev sahibliyi edəcək. Bununla da ölkə Qətərdən sonra turniri qəbul edən ikinci Yaxın Şərq dövləti olacaq. Bu qərarlar FIFA-nın regional balansı qorumaq və futbolun qlobal inkişafını dəstəkləmək siyasətini davam etdirdiyini göstərir.
Bizi sosial şəbəkələrdən izləyin!!
